Mbappe aia hlawh hnem Kai Havertz

French forward ropui Kylian Mbappe chuan Paris St-Germain kalsanin khawvela football club ropui ber Real Madrid a zawm fel tawh. Mbappe hi Real Madrid-ah hlawh hnem hluai tura ngaih a nih laiin rin ang he huin a hlawh tam bik lo va, EPL player zingah amah aia hlawh hnem player 10 zet an awm. Arsenal leh Germany forward Kai Havertz pawh Mbappe aia hlawh hnem zingah a tel.
World Cup-ah rawlthar tha bera thlan tawh leh top-scorer ni tawh bawk Mbappe hian Santiago Bernabeu-ah kum nga daih contract a ziak a. Daily Star in a tarlan dan chuan Mbappe hian chawlhkar khatah £250,000 a hlawh dawn a, hei hi PSG-a a hlawh aiin a tlem zawk. A hlawh hi tam angin lang lo mah se bonus dawn tur a nei chhah thung a. Bonus a dawn theih tur hi £80million – £128million vel zet niin tarlan a ni thung.
Hlawh pangngaiah ngau ngau chuan Mbappe aia hlawh hnem EPL-ah player 10 zet an awm. English Premier League player zinga hlawh hnem ber chu Kevin de Bruyne a ni a. Manchester City leh Belgium midfielder pawimawh De Bruyne hian chawlhkar khatah £400,000 a hlawh mek a, Mbappe aiin kar khatah £1500,00 zetin a hlawh tam zawk tihna a ni. EPL player zinga hlawh hnem ber dawttu chu City goal thun khawl Erling Braut Haaland a ni a. EPL-a top-scorer ni zawn thei Haaland hian chawlhkar khatah £375,000 a hlawh mek niin tarlan a ni.
Manchester United midfielder Casimiro leh Liverpool forward pawimawh Mohamed Salah ten kar khatah £350,000 an hlawh mek a. Chelsea player pahnih Raheem Sterling leh Romelu Lukaku ten kar khatah £325,000 zet an hlawh mek bawk. Bernardo Silva, Jack Grealish leh Marcus Rashford ten kar khatah £300,000 theuh an hlawh a. Chelsea a flop, Arsenal-a vul Kai Havertz chuan kar khatah £280,000 a hlawh mek a. Mbappe aiin a hlawh tam zawk hret tihna a ni. Tarlan tawh angin Mbappe hi a hlawh pangngai ngawr ngawr chu rin lawk ang he huin a tam lo a, bonus dawn tur erawh a nei chhah thung.
French national team leh PSG-ah lal ang maia awm Mbappe hian Real Madrid-ah a jersey no duh a chang ngawt thei rih dawn lo niin tarlan a ni. Mbappe-a number ngainat chu No. 7 leh No. 10 a ni. Real Madrid player pawimawh Vinicius Junior chuan No. 7 a ha mek a. Veteran player, midfielder ropui zinga mi Luka Modric-a’n No. 10 a ha mek bawk. Vinicius Junior leh Modric te hian an larpui tawh number hi Mbappe ken ngawt an tum lo niin a lang. Croatian playmaker Modric hian Santiago Bernabeu-ah kum khat cham belh turin contract a ziak a. Mbappe hian No. 1 ha thei turin kum khat tal a nghah a ngai dawn niin a lang.
A number ngainat No. 7 emaw No 10 emaw zawk zawk pawh a chang thei dawn rih lo nia a lan vangi Mbappe hian Karim Benzema hak thin No. 9 a ha rih tura ngaih a ni.