Mbappe leh Neymar tel loa talbuai nghal PSG

Mbappe leh Neymar tel loa talbuai nghal PSG
Inrinni zanah Paris St-Germain chuan an hmatawng langsar pahnih Kylian Mbappe leh Neymar tel loin French League 1 season thar bul an tan a, goal awm loin an mikhual Lorient an inhnehtawkpui ringawt!
An superstar pair hmalam hun hi tun thlengin a la chiang thei lo a; nipui insuan hun a la tawp lo a, Paris atanga kalbo tura sawirik an nih ve ve laiin Ligue 1 title humhim tura an chetchhuah vawikhatnaah squad pawh an luah ta lo phawt chu a ni a, Messi chhuah hnua Mbappe leh Ney-mar tel lo lehzela Luis Enrique team season hman dan tur chu ngaihthatthlak loh viaua ngaih a ni!
He inkhelah hian PSG lamin ball chang tam zawk ngial mah se ‘chance’ chiang fek fawk siam-chhuah an harsat a, an attacker hlauhawm pahnih tel lo chuan an tlarhma a bil tlat tih a hmuh theih.
Defensive midfielder Manuel Ugarte chu mualneitu team tana thun teuh ber niin, ani pawh hian hun pekbelha a hun tha hmuh chu goal ban pawnah a thawnchhuak.
PSG manager thar Enrique tan bultanna tha a ni hlawl lo a, kumin nipui laia a thlak tak Christophe Galtier thlen chin pawh kha a thlenpui zo lo mai ang tih pawh awl za te a ni!
Inrinni inkhel kha khelmual sir thutna atangin Mbappe leh Inrinni zing lama Barcelona atanga pound maktaduai 43.5-a an lei fel hlawt France forward Ousmane Dembele-te’n an thlirliam.
Dembele international team-mate Mbappe hi Real Madrid nena sawizawm reng a nih karah tunlaia superstar zawng zawng hup zawh vek tum ang hrima kawlhrawng leh sum nei bawk si Saudi Arabia lam pawhin sum tam mangkheng hlawh turin an sawm a, tun thlengin thutlukna la hrualmum lo mah se PSG first-team squad rualin season thar inbuatsaihna lamah a chechhuak ve ta lo a, season thar bultanna lehzela a inlan lo zui hian chhuah lam hawi hlea ngaih a ni!
Nakkum nipui thawt thleng chauh hi PSG-ah contract nei tawh mah se contract pawhsei tumna a nei lo tih club a hrilhchiang tawh a, chuti a nih chuan Paris club hian duhthlan tur pahnih chiah an nei ta niin a lang a, pakhat chu hlutna sang tak a la neih laia sumtuakna atana a rang a ranga hralhchhuah emaw a contract zawh thlenga chhawr zui zel a, nakum ni-pui insuan laia man nei loa chhuahtir emaw a ni ta.
PSG hian a free-a chhuahtir ai chuan Mbappe hralh hi an duh a, mahse, kum 24 mi hian sum tam lutuk hlawh tura nakkum nipui laia free transfer-a Real Madrid zawm a duh niin media lamin an tarlang a, an la innawr mek niin a lang.
Bul tan ve ta lo phawt dang Neymar pawh hi Barca lama kirleh tura sawirik a ni mek bawk.
He boruakah hian Paris St-Germain chuan Barcelona forward Dembele an lalut ve chiah a; France forward hian nikum khan June 2024 thleng Catalan tana khel turin a contract neih lai pawtsei mah se kum nga chhung atan Ligue 1 champion a zawm leh ta zawk a ni.
Kum 26 mi Dembele hi kum 2017 khan Barca chuan Borussia Dortmund atangin pound maktaduai 135 tehrengin an lei chhuak a; Nou Cam club chu La Liga title pathum lakpuiin, game 185-ah goal 40 a thunsak tling.
2018 World Cup winner hian Paris St-Germain a zawm thei chu hlimawm a tih thu sawi chungin thuam thar inbel thuai thuai hlan a nghah-hlelh thu a sawi a, “He hmunah hian hma ka sawn belh zel ka beisei a, club fans inchhuah phah larhna tur khawpa chet theih ka inbeisei bawk,” a ti.
Tarlan tawh angin, Dembele hian Copa del Rey trophy tum hnih a lakpui tawh Barcelona-ah nikum khan kum hnih dang cham belh leh turin a contract neih lai a pawtsei a, mahse, tun thlatir mai khan Barca coach Xavi chuan Dembele chhuah duh thu hi nemnghetin, PSG president Nasser Al-Khelaifi chuan a sum bawm a hawng ta a ni.
Nikum December thlaa World Cup final khel Dembele hian a malpui a tihnat tak avangin season liamta second half pumpui kha a thiante inkhel enna’n hun a hmang a ni ber a, tunah summer transfer window inhawn laia PSG player leithar pakuana a ni zui ta a ni. France tan match 37-ah Dembele hian goal li a thun tling ve tawh bawk.