Mbappe pawngsual thubuai an titawp

Sweden rama French football captain Kylian Mbappe khingtu dan hre mite chuan Swedish media lamin pawngsuala inhnamhnawih nia puhna an chhuichian hnuah case kaltlangtir loin an titawp.
Swedish Prosecution Authority mi leh sa senior prosecutor Marina Chirakova chuan Stockholm khawpuia pawngsual leh inkhuaikhemna dangthleng anga media lam puhna chu a nemnghehna mumal a awm loh avangin an titawp tih a sawi.
Tunlai football star zinga mite ngaihven hlawh berte zinga mi Real Madrid player hian kumin October thla khan an puhna chu ‘fake news’ mai a nih thu sawiin, a dan hre mi rawih pawhin intihhmingchhiat manah khinlet an tum thu a lo sawi ve tawh bawk a ni.
Le Figaro newspaper tarlan danin, October ni 10 khan Swedish khawpuia hotel pakhatah pawngsual thlengin, hur sualna kaihhnawih (sexual harassment) case dang pahnih a thleng bawk a, Swedish chanchinbu Aftonbladet leh Expressen bakah public broadcaster SVT-te chuan rinhlelh zingah Mbappe an rinlut.
He thil thlen lai hi Stockholm-a Mbappe zin lai a lo ni ve chiah a; media lamin hetiang thu an tihchhuah hnu hian police lamin FRance captain thlenna Bank hotel an tlawh a, report pakhata tarlan danin, a chhuitute hian evidence atan hotel-a thawmhnaw thenkhat an la.
Tunhnai khan French TV show Clique an tihah he case chungchang hi a vawikhatna’n Mbappe chuan a sawichhuak a, inrawlhna a neih loh thu sawi chungin, “He case kaihhnawihah hian engmah dawn ka ni lo a, a chhuitute atangin kohna (summon) pawh ka dawng lo,” a ti.
A ukil rawih pawhin Swedish media report hrang hrangte an dem thu leh amah ruaitu laka eng complaint mah an dawn loh thu sawi chungin intihhmingchhiat tumna mai niin a sawi.
Ukil chuan, “Mbappe hi amahin a khawsa ngai lo a, khati ang dinhmuna ding tur leh risk sang tak hmachhawn thei turin amah chauha thlahfal a ni ngai lo,” a ti.
Kumin nipui thawt laia Paris Saint-Germain chhuahsana Real Madrid zawm ta French forward hian tunkar Champions League-ah goal khungin, a career-ah Champions League goal 50 a thun tling.
Kum 2018 khan rawlthar mai la ni chungin Mbappe hian Russia ramah World Cup trophy a chawi a; Qatar rama 2022 final-ah hat-trick siam leh mah se penalty petah France chuan Lionel Messi telna Argentina an ngam ta lo a ni.
PSG-ah khan Messi leh Brazilian forward Neymar-te nen tlarhma lam luah hoin ‘superstar trio’ tih an ni a, mahse, Ligue 1 club awh ber Champions League title an lakpui zawh loh hnuah an chhuak darh zo ta a ni!
Nikum khan Paris khaw tuiliak hi Ballon d’Or lehBest FIFA Men’s Player prize dawngtur thlannaah pathumna ve ve a ni.