MBBA Cup 2025 Hawla Indoor Stadium-ah khel mek
MSSC Golden Jubilee MBBA Cup 2025 chu November ni 17 atang khan khelh tan a ni a, inkhelhna hmun Hawla Indoor Stadium ni thum zet rokhawlhna avanga hman theih loh a nih hnuin November ni 24 atang khan khelh chhunzawm leh a ni a; inkhel hi MBBA Youtube channel-ah live a tihchhuah thin a ni.
Tun tum inelnaah hian MBBA hnuaia MSL club pariat, D League club 10 leh ADBBA leh Mamit District Basketball Association hnuaia club pakhat ve ve ten he inelna hi an hmachhawn.
Pool hi 4-a then niin, pool champion theuh leh pool pali atanga runner up ti tha club pathumte’n quarter-final an lut ang.
Hetih rual hian MBBA hnuaia hmeichhe club palite’n inelna hi an nei mek bawk a ni.
Hoops Mania Time Out
1. Tun tum MBBA Cup hi duhkhawp lohna a awm nghal pang a, ni thum zet inelna neih a nih hnua Hawla Indoor Stadium hman theih loh a nih chungchangah hian khelmual avanga harsatna lo tawk zo hlim ADBBA Cup 2025-ah khan inelna hmun dangah khelh niin, fixture-ah buaina a awm hran lo; amaherawhchu, khelmual dang MBBA hian melh lo va inelna neih hun chhung a pawtsei hi ADBBA lam a tluk lo!
Khelmual hi remchan lohna avangin inelna neih hun chhung pawhsei leh tihtawi tun hnu zela a ngaih tawh lohna turin MBBA lam hian ruahmanna a siam lawk leh a neih lawk hi a tul takzet.
Fixture tihdanglam hi a lo awm tawh thin a, Mizoram Super League hialahte pawh hmuh a lo ni tawh. Hei hian tualchhung players leh hnam dang players chetvelna thleng a nghawng theih avangin fimkhur a ngai hle.
Fixture milin club leh players thlengin lo inrinlawk a ni tawh thin si a, harsatna hi tul lovah a pian theih phah thin tih MBBA puipa lam pawhin a hriatpui a ngai.
2. Tuikual South Basketball, MSL club hian tun inelna neih mekah hian Zemabawk BC leh D League club OPD Venghlui BC hneh lovin an tlawm a, inelna hnuhnung berah hian Mamit Dist. aiawhtu Trojans lakah hnehna an chang lo nawn leh a nih ngat chuan MSL club hi Mizorama basketball veng hrawl ber zinga mi TKS veng record tihnawktu a ni dawn.
He club hian thlawpna a mamawh hun san lai ber a tawng mekin a lang!
Thla hnih hnu maia MSL XI khel tur club hian danglamna a mamawh.