MBSS zirchhuakte MPCC-in lawmpui

Mizo zirlai 75 leh state dang zirlai 20, an vaiin mi 95-in ZMC atanga MBBS zirchhuak a, hlawhtlinna an chang ta chu Congress party chuan lawmawm a tih thu sawiin, zir chhuak ta te an kal zelna turah duhsakna a hlan tih a sawi.
MPCC thuchhuak chuan, Congress sawrkar hmasa chief minister Pu Lal Thanhawla’n damlo khawsak harsa zawkte tan phai lam kher ngai loa, damdawi in changtlung kan neih theihna tura a hmalakna MNF-in cheng vaibelchhe 78 seng chunga an tihhlawhtlin theih loh chu Congress sawrkarin bul tan tha lehin, 2010 December 10 ah Referral Hospital hi CM Pu Lal Thanhawla’n a hawng a. Hospital changtlung kan neih theihna atana khatih laia CM Pu Hawla, Health minister Pu Lalrinliana Sailo leh parliamentary secretary Pu S. Laldingliana te an thawkrim hle tih a sawi a ni.
Kum 2013 atangin medical college neih tumin Congress party chuan theihtawp a chhuah a. 2014 February 19-ah sawrkar laipui Ministry of Health & Family Welfare chuan Mizoram sawrkar hnenah medical college din phalna pe in, sum pawh vaibelchhe 189 a sanction a. Medical college neih theihna turin Health minister Pu Lal Thanzara’n theihtawp chhuahin a bei a. Harsatna tam tak paltlang chung leh NEDP sum hmanga khawl changkang leh tha zawk tam tak lei a nih hnu ah, tehna hrang hrang paltlanga Medical Council of India-in medical college din phalsakin, a hming atana MIMER a pawm sak nghal tih a sawi bawk.
‘Harsatna tam tak paltlang chunga Congress sawrkarin a lo sual chhuahna azara zirlaiten result tha tak an nei leh, a bikin Mizo thalai mi 75-in MIMER, tuna ZMC tia MNF-in an phuahchawp atanga MBBS an zir chhuak thei ta hi Congress party chuan lawmawm a ti a, thawktute pawh an kal zelna turah duhsakna kan hlan a ni,’ thuchhuah chuan a ti.