MCC bawhchhiaa puh minister pahnih chungthu SEC-in a rel

MCC bawhchhiaa puh minister
pahnih chungthu SEC-in a rel
Village council leh local council inthlanpui neih tura political party tin an campaign meknaah minister pahnih chu election model code of conduct bawhchhiaa puhin MNF Gen. Hqrs. chuan January 30 khan State Election Commission Mizoram hnenah ziakin a thlen a. Thawhlehni khan an chungchang thu ngaihtuahnaa thutlukna tihchhuah a ni.
Aizawl North-I bialtu MLA, minister Vanlalhlana hi sawrkar pisa chhungah party mal tana campaign-na thu video hmanga siama puh a ni a. Hemi chungchangah hian State Election Commission (SEC) ah model code of conduct (MCC) bawhchhe tura a tum reng vanga video clip chu siam anih loh thu leh, dan bawhchhiatna a ni tih hre lova, tihpalh a nih thu sawiin, ngaihdam a dil a; MCC bawhchhiat tawh loh a intiamna chu pawmsak niin, a video upload pawh delete tura hriattir a ni a, hemi atana a hmalakna hi ni thum chhungin SEC-a thehlut tura hriattir a ni.
Minister Lalnghinglova Hmar hi a bial Aizawl West-II huamchhunga sawrkarin hna thawh a tum dan a sawichhuah avanga complaint thehluh a ni a. SEC chuan amah hekna leh minister insawifiahna a ngaihtuah hnuah thutlukna siamin, Election Model Code of Conduct Para-VIII (2) leh (14) bawhchhiatna a nei lo tih a sawi. Minister hian party mite hmaah sawrkar hmalakna awm tawh sa leh hmalakna kal mek a hrilhfiah mai a ni a. MCC-in a sawi hmasawnna lam hawia bul tanna lungphum leh policy thar puan, thawh zawh tawh hawnna emaw chutiang lam kaihhnawih hawnna inkhawm leh ruahmanna thar lam hawi puan chhuah loh tur tih hian a huam lo a ni, tiin SEC hian a sawi.