MCC bawhchhiate kan umzui zel dawn – DEO

Mizoram MLA inthlanpui hun puan a nih tawh avangin election model code of conduct hman a ni tawh a, an huamchhunga dan bawhchhiate chu khawng takin an umzui zel dawn tih Aizawl district election officer Nazuk Kumar chuan a sawi.
Aizawl district bawrhsap ni bawk Nazuk Kumar chuan inthlan puan a nih tawh a, model code of conduct (MCC) kalpui a nih tak avangin mipui leh political party-te, sawrkar hnathawkte chu he dan bawhchhe lo tura chahin, bawhchhiate chu khawng takin an umzui zel dawn tih a sawi.
Zawhna chhangin, inthlan muanawm leh fel neih a nih theih nan MPF atanga siam hman khat daih hmanrua leh tawih theih lo hmanrua hmanga campaign kalpui loa, environment tana him hmanrua chauh hmang turin a ngen tih a sawi a. Heng hmanrua hmang hian poster leh banner siam lo turin a ngen tih a sawi bawk.
Tuivawl biala Zokhawthiang, Mauchar leh Tinghmun Polling Station chu venhimna uluk zual ngai bik, critical polling station a ni tih Nazuk Kumar hian a sawi a. Heng hmunah hian webcasting tih tum vek a nih thu a sawi. Inthlan kaihhnawia social media hmansual leh paid news vil turin Social Media Cell din a ni a; electronic, print leh social media a thuchhuah ngun takin a thlithlai dawn tih a sawi. Khua leh tuiten zau zawka inthlan kaihhnawiha an tel theih nan leh langtlang taka thil kalpui a nih theih nan ECI duhdanin IT application hrang hrang hman tum anih thu te, voter helpline app & NVSP, pianphunga rualbanlote tan Saksham app, lungawi lohna neiten an thlenna tur Suvidha app leh portal bakah candidate-te chanchin tarlanna – Know Your Candidate app siam a ni tih a sawi a ni.

4Aizawl district-ah Aizawl West-I bial chu voter tamna ber a ni a, voter 29810 an awm. Tuivawl bial chu voter tlemna ber niin voter 17844 an awm.
4Polling station malah elector tamna ber chu Zemabawk VIII P/S niin 1481 an awm. Chhanchhuahna P/S chu voter tlemna ber niin 85 an awm.
4Aizawl district-ah polling station 321 a awm a; heng zinga polling station pathum chu venhimna khauh zawka kalpui ngaihna a ni.
4Urban huamchhungah polling station 257 leh thingtlang (rural) ah 64 a awm a, heng polling station-ah hian ECI-in awm tura a tih, assured minimum facilities dah vek tura hma lak a ni.
4Assembly bial tinah hmeichhiain an vil polling station – Pink Polling Station pathum theuh dah tum a ni. Hei bakah hian ‘model polling station’ pakhat dah a ni dawn.
4Vote thlak nan ECIL siam M3 model thar ber EVM leh VVPATs hman a ni dawn.
4Vote chhiarna atan Assembly bial tin tan counting hall pakhat zel buatsaih a ni a, a bulhnaiah strong room buatsaih fel a ni tawh. Counting table 8 atanga 14 dah a ni.