MCO-in aia upa zah kawngah nasa zawka inzirtir tum dawn

MCO-in aia upa zah kawngah
nasa zawka inzirtir tum dawn
Mizo Cultural Organisation chuan aia upa zah kawngah nasa zawka inzirtirna kalpui a tum dawn.
Mizo Cultural Organisation (MCO) hian Zirtawpni khan Aizawlah general assembly a hmang a. An thurel zingah aia upa zah kawnga inzirtir bakah zirna inte puala hnam lama inelna buatsaih, sawrkar nen tangduna hnam zia vawnnun kawnga nasa zawka hma lak, Mizorama mipui a bikin khualzinten an tlawh tam deuh hmuna Kut an hman thinah man chawia hnam thuam hawh theih tur phochhuah dan ngaihtuah rawtna an pawm a ni.
Kum 2026- 2028 atana MCO budget ruahman Rs. 9,13,100 an pawm bawk.
General assembly hi hun thumah thenin, hun khatnaa thusawitu MCO president Robert Romawia Royte chuan MCO chu politics rawng kai lo tlawmngai pawl a ni, tiin, hnam tana a hlutna a sawi a ni.
Mizo hnam inpumkhatna turin hnam lam leh zai hmanga hma lak theih a nih thu, Mizoram leh hnam himna tura dawt huaa, thudik tan ngam a tul zia thu a sawi a. Hnam humhalh kawnga theihtawp chhuah zel tur leh Mizoram mawina leh Mizo hnam zia leh nunmawi zau zawka pholan kawngah theihtawp chhuah zel turin a sawm bawk.
MCO general assembly-ah hian an executive committee member – a hnathawh that avanga Governor Medal 2026 dawngtu F Zomuanpuia leh MCO Performing Troupe member – Young Talented Award dawngtu Lawmsangzuala te hnenah lawmpuina hlan a ni.