Media Conclave-ah MJA aiawh tel

Media Conclave-ah MJA aiawh tel
Kohima Press Club kum 25 tlin denchhena buatsaih hmarchhak state chanchinbumite inkhawmpui (NE Media Conclave) chu January 20 khan Kohima-ah neih a ni a, khawmpui thupui chu ‘Reimagining Truth: Northeast Journalism for a Changing World’ tih a ni.
Conclave-ah hian Mizoram Journalists’ Association aiawhin Vanlalrema Vantawl, editor Zalen leh Andrew Lalremsanga, DD News an tel.
Conclave pual hian panel discussion neih a ni a. ‘Journalism as peace work: Navigating divides, building bridges & a strong media ecosystem for Northeast’ tih sawiho a ni. Vanlalrema Vantawl hi speaker zing ami a ni a, Mizoram buai laiin ‘peace journalism’ lo awm tawh nise Mizoram chu kum 20 chhung a buai kher a ring lo tih a sawi.
Kum 2021-a Assam leh Mizoram Police inkah tum pawhin national media tam takin tan bik nei lem loin reporting an pe tlangpui tih a sawi a. “Peace journalism chuan buaina chhuak chu a thup kher a ngai loa, boruak ti sosang zawngin a ziaktuin a ziah loh erawh a mawhphurhna niin media ethics pawimawh tak a ni a. Mizoramah chuan a tul dan azirin a pawl angin MJA an che chhuak thin,” a ti.
Mizoram-in raltlan mi sing tel lo dawngsawnga enkawl leh chhawmdawl kawngah sawrkar bakah tlawmngai pawl hrang hrang leh kohhran-in hna an thawktha tih a sawi a. Mipuiin raltlan dinhmun an hriatthiam theihna turin media-ten uar taka an chhuah dan a sawifiah a ni.
Tunlai media tana chona lian tak chu, raltlante leh Mizo mipui inkarah boruak tha lo a awm lohna tura thuziah thiam a tul tih Vanlalrema Vantawl hian a sawi a. Mizorama media mite, a bikin new media lam luhchilhten peace journalism-ah training, workshop leh mentoring an mamawh tih a sawi bawk.
Hmarchhak State Media Conclave-ah hian chanchinbumi 100 vel an kalkhawm a. Hawnna inkhawmah Kohima Press Club president Alice Yhoshu chuan Kohima Press Club-in kum 25 a tlin thlenga journalist ten thawhhona tha tak an nei chu lawmawm a tih thu a sawi.
Press Club of India-a hmeichhe president hmasa ber ni mek Sangeeta Barooah Pisharoty chuan, hmarchhak tualchhung media-te darhzau lo mah se, a taka NE chanchinthar chenchilhtute an nih vangin dahhniam chi an ni loa, hetihlai hian thudik haichhuah kawngah a lan dan mai duhtawk loa thuk zawka an luhchilh a tul tih a sawi a ni.