Medical negligence leh mipui

Mizoram State Consumer Dispute Redressal Commission chuan kum 2021-a Serchhip district hospital-a Pi Malsawmkimi, Tlangpui khua, nau chunga a thih chungchangah Mizoram sorkar chu cheng nuai 52.2 zangna dawmna pe turin a ti a. Nau neih lai hian hospital-a thawk nurse ni lo, mi dang ai kalin a enkawl nia sawi a ni bawk.
Pi Malsawmkimi pasal hi, Gauhati High Court (Aizawl Bench) ah a lo zualko tawh bawk a, Gauhati High Court hian Serchhip District Hospital hi cheng nuaih nga a lo chawitir tawh a. Gauhati High Court hian Zangnadawmna tam zawk phuta hmun danga an zualko a phalsak angin, State Consumer Court-ah thubuai thehlutin a zualko leh ta a ni.
Court pahnih meuhvin thiamloh a chantir a ni a, Serchhip hospital-a nau chunga thihna thleng chungchangah hian damlo enkawlna kawngah nasa taka inthlahdahna (medical negligence) a thleng tihna a ni a. ‘Ai kal nurse’ a lo inrawlh ve bawk nen, hospital inrelbawlna a dik lo hle a ni ang tih a rin theih.
State dangah pawh, hetianga medical negligence avanga damdawi in emaw, doctor emaw pawisa chawitira hremna lekna hi a thleng thin. |henkhatah chuan, State Consumer Disputes Redressal Commission thutluknaa lungawi lo, National Consumer Disputes Redressal Commission hnena zualko leha hlawhtling zui ta te pawh sawi tur an awm. Supreme Court pawhin, hetiang medical negligence thila thubuai awm chungchangah hian court ruling a lo siam tawh bawk. Hmun dangah pawh medical negligence hi a tam hle a ni.
Damdawia inenkawlna kawnga lungawi lo, social media lama lungawilohna tlangaupui chiam thin hi Mizote zingah sawi tur an awm nuk mai a. Damdawi ina inekawlnaah emaw, thihna hial a thlen danah emaw, lungawi lo, thinrim em em, mahse phun lungawi zui leh ta mai mai hi tam tak an awm bawk.
Mipui lam hian kan zir ve a pawimawh hle. Doctor leh nurse-ten damlo an enkawl danah thil fehlel a thleng nia kan hriaa kan hmu a nih chuan, inthlahrung lovin zawtfiah thin ila, chumi hnua kan la lungawi lo cheu a nih chuan thuneitute hnenah complaint thehlut thin ila, hei hi intihmualpho leh thinrim hrikthlakna hrim hrim atan ni lovin, tun hnua thil tha zawk a thlen theihna tur zawk a ni a, chu chuan doctor leh nurse te inthlahdah tur te pawh a veng ve ang a, mipui tawrhna pawh a nep zawkin, damlo tan pawh a hlawk dawn a ni.
Doctor leh nurse-te hi mihring hriselna enkawltu an ni a, an hluin an zahawm em em a, an hna (profession) hi hna thianghlim a nih piah lamah, mihringpuite rawngbawlna pawimawh tak a nih avangin mipui zah pawh an kai hle a ni. Chutih rualin, mihring ve bawk an nih avangin tisual thei an ni ve tho a, damlo an enkawlna kawngah tihsual palh an lo nei a nih pawha mualpho hlauh vanga inthupsak mai lova, thudik tak lanchhuahtir ngam khawpa huaisenna an neih a pawimawh hle. Chutiang thilah chuan a tuartu lam tan pawh a tawrh dan a ziaawm deuh ngei ang. Chutih rualin, mihring nunna khawih thil a nih avangin, doctor leh nurse-te hi chuan pawlawh taka thil an tih mai mai hi a thiang ve lova, engkimah ‘a tha ber’ ‘a him ber’ an ngaihtuah reng a pawimawh tih chu a hrechiangtu hlei hlei an ni awm e.