Medicinal Plants Board THUKHAWM

Mizoram State Medicinal Plants Board chu nimin khan health minister hovin an thukhawm a, ramhmul damdawi chungchanga hmalaknate thlirhovin, hmalak chhunzawm dan turte an rel nghal a, ramhmul damdawi chungchanga zirchianna (research & development) pawh nasa lehzuala kalpui an rel a. SMPB Mizoram hian, ramhmul damdawi chin pun, humhalh, a chungchang inhrilhhriat leh kawng hrang hranga tichangtlung turin hma a la thin, tih chu sawrkar thuchhuah dan a ni.
State Medicinal Plants Board hi sawrkar laipui lam ruahman angin October 1, 2001 khan Mizoramah din a ni a, kum 25-na a hmang mek ta. Mizoramin ramhmul damdawi a neih that dan te, economy nghawng thei khawp a nih dan te hi ram hruaitute chuan hahipin an lo sawi tawh thin a. Ramhmul damdawi chungchangah hian kum 25 chhung chu hmalakna a lo kal ve tawh tihna a ni a; mahse, tun thleng hian hmalakna liantham hi hmuh tur a la awm mang lo niin a lang a, ‘an thukhawm’, ‘an rel’, ‘an sawiho’, tih vel bak hi chu hriat tur a awm lo. ‘Mizoram siam chhuah ramhmul damdawi thawnchhuak’ tih thawm kan la hre lo niin a lang. Ramhmul damdawi siam theihna chi thlai (medicinal plants) hausa inti em em state hian, tualchhunga hman tur takngial pawh hi kan la siam chhuak vak lo niin a lang bawk.
AYUSH hnuaia SMPB a awm hnu khan Mizorama medicinal plant 17 chu Central-in a pawmpui tawh thu tarlan a ni a. Medicinal plants hi district tina tam thama chin tur a ni, tiin rel a ni tawh bawk a, khangte kha engtin nge ni ta zel? Shifting cultivation kan bansan thei si lo a, hengte hian ramhmul damdawi humhalhna te hi a nghawng reng em? Eng tin chiah nge maw SMPB hian research a lo kalpui tawh a, engtin nge nasa lehzuala kalpui a tum? tihte pawh hi chipchiar deuh zawk te pawhin mipui hriatah han puangzar thin se, eizawnna kawng thar hawnna tur thil a ni a, ‘|HUKHAWM’ tih thu ngaihthlak leh ngawt thin ai chuan mipui tan pawh a phurawm deuh awm asin.