Mediterranean-a pem tur phur lawng chesualah unau thum thi

Mediterranean-a pem tur phur lawng chesualah unau thum thi
Mediterranean lailia tui fawn metre 1.5-a sangin a vawrh hnuah pem phurtu thelret lawnga chuang hmeichhia unau thum chu tuiah an tla tih German chhanchhuaktu pawlin an sawi.
Mi 65 chuang chhanchhuah an ni a, an zingah hian thite nu leh an nuta pawh an tel a, nau pai lai hmeichhe pathum leh naute thla sarih mih pawh an tel tih RESQSHIP chuan a sawi.
‘Hlauhawm khawpa tam chuanna’ lawng hi Libya-a Zuwara khawpui atanga chhuak niin tui fawn nasa takin avangin an lawngah tui a lut nasa a, a pil ta niin an sawi.
Libya hi pemten Mediterranean Sea zawha pem tuma an chhuah tanna hmun ber niin Italian thliarkar, Lampedusa-a thlen an tum thin.
Hmeichhe unau thum thite hi kum kua, 11 leh 17 an ni tih RESQSHIP chuan a sawi.
Inrinni khan an ruang hi hmuh a ni tih RESQSHIP Communications Coordinator Barbara Sartore chuan a sawi.
RESQSHIP chuan dama an chhanchhuahte zingah hian tui leh lawnga petrol inpawlh avangin an vun a kang nasa hle a, thenkhat chu enkawl ngai hial an nih hlawm thu an sawi.
Chetsualna an tawn hmaa lawng atanga tla pakhat chu a chin an la hre lo bawk.
Italian coastguard pawhin Inrinni chawhnu khan mi 14 an chhanchhuak a, Lampedusa-ah hruaiin a hnua chhanchhuahna lawng thlengin mi dangte leh hmeichhe thite hi an la ta a ni.
RESQSHIP hian thite hi eng ram mi nge an nih an la puang lo.
UN agency-te chuan Africa khawmualpui hmar lam atanga Mediterranean tuipui kana pem tum mi 700 chuang kuminah an thi tawh tih an sawi a. Chhanchhuah leh mi zawn hna thawhna hi tihchak a ngai hle tih an sawi tawh thin.