Medvedev hneha Halle lallukhum khumtu Bublik

Medvedev hneha Halle lallukhum khumtu Bublik
Tunlaia harhtharna rawn chang chho mek Kazakhstan star Alexander Bublik chuan Pathianni khan Germany rama Halle Open final-ah 6-3, 7-6(4)-in Daniil Medvedev a hneh a, a career-a he title a lak vawikhatna a ni nghal.
Kum 27 mi Bublik hi tunhma lama tum ruk ngawt Russian Medvedev a lo hmachhawn tawhah a la tlawm fai pak a, chutih kawngah chuan set khat chiah a la nghe nghe a!
Pathianni final erawh mak tak maiin a dan a dang ta zak a, a ngam loh laklawh kaltluang lai a tawpsanna kawngah grass-court tennis ropui a entir nghe nghe!
Ti hian, world number one hlui Medvedev-a tan tun hi Tour-level final a khelh hnuhnung vawi ruka a tlawm vawi khatna a ni.
Last 16 lama world number one Jannik Sinner pawh lo paltlang tawh Bublik hian final match-a a puitlin tawhzia a lantir a, unseeded ni chungin third seed Medvedev lakah German grass chunga 2023 title a lo sual chhuah ve tawh kha a chhunzawm leh ta a ni.
Thla hmasa maia ATP ranking lama world top 75 pawn lama la khawsa leih leih chauh Bublik hian tunhma lama a la hneh theih ngai loh Daniil a hneh ve ta hlawl chu a career-a hnehna tuihnai berte zinga pakhat a nih thu sawiin, rilru leh taksa thahrui heh tak a nih thu a tarlang tel.