Megadeth-in US-ah No.1 album an nei ve ta

On Feb 4, 2026 0 0

Megadeth-in US-ah No.1 album an nei ve ta
Metal band Megadeth chuan an studio album hnuhnung ber tur ni tawha an sawi, an band hming chawia album an buatsaih ‘Megadeth’ chu Billboard 200 (US albums) chart No.1-a a debut a, he chart-ah No.1 album an neih vawi khatna a ni.
Megadeth hi Billboard chart-a an lanna hmasa ber chu 1986 daih tawh kha a ni a, an rimawi career-ah chart-a lang thei album 23 an nei tawh a, a hmaa he chart-a an thlen sân ber cu 1992-a an album ‘Countdown to Extinction’ kha niin, chart No.2 a kai a, tunah, chart-a an lan tan atanga kum 40-ah No.1 album an nei ve ta a ni.
Billboard 200 chart hi kar khat chhunga US-a album lar dan tehna niin, chart ranking siam nan hian kar khat chhunga US-a album hralh tam lam chu tehna pawimawh a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
‘Megadeth’ hi US-ah kar khat chhungin 73,000 an hralh a, chung zinga 69,000 chu album tak tak hralhna niin, streamin atangin 4,000 (on-demand official stream maktaduai 4.23) a ni a, hla mal hralhna chu chhiar tham a ni lo.
Chart No.1 hlui Morgan Wallen “I’m the Problem” chu 69,000 hralhin No.4 atangin No.2-ah a insawn leh hret a, Olivia Dean ‘The Art of Loving” chu 51,000 hralh lehin No.7 atangin No.3-ah a insawn a, chart No.1 hlui Zach Bryan ‘With Heaven on Top’ chu 49,000 hralh lehin No.5 atangin No.4 a insawn leh a, kar kalta No.1 ASAP Rocky ‘Don’t Be Dumb’ chu 46,000 hralh lehin No.1 atangin No.5-ah a tawlh ve thung.
Chart No.1 hlui Taylor Swift “The Life of a Showgirl’ chu 45,000 hralh lehin No.8 atangin No.6-ah a insawn leh a, YoungBoy Never Broke Again ‘Slime Cry’ chu 41,000 hralh lehin No.6 atangin No.7-ah a tawlh a, chart top 10 khart a hnunglam pathumte chu No.1 hlui vek an ni a, KPop Demon Hunter soundtrack chu 40,000 hralh lehin No.7 atangin No.8-ah a tawlh a, Bad Bunny DeBiTiRAR MaS FOToS chu 36,000 hralh lehin No.3 atangin No.9-ah a tawlh a, SZA ‘SOS’ chu 35,000 hralh lehin No.11 atangin No.10-ah a kai thar ve leh ta bawk.