Meichher chanchinbu award sem

Directorate of School Education Adult Education Wing buatsaihin Zirtawpni khan Aizawlah ‘Meichher Award 2023’ sem a ni a. School Education minister Dr Vanlalthlana’n hmanpuiin, Meichher chanchinbua thu leh hla ziak tha (Meichher Best Article of the Year) leh thu leh hla thawh hlawk (Meichher Best Contributor of the Year) lawmman dawngtute hnenah chawimawina a hlan.
Meichher Award 2023 a chawimawina dawngtute hian lawmpuina thuziak bakah pakhatna in sumfai Rs. 3000, pahnihna Rs. 2000 leh pathumna Rs. 1000/- an dawng a ni.
Meichher Best Article of the Year 2023 pakhatna hi Rev VL Luaia Hranleh, Mission Veng Aizawl a ni a, a article chu “Kumpui sul leh kan nun” tih a ni. 2-na Rev PC Muanthanga, Mission Vengthlang Aizawl a ni a; “Aw, Bethlehem ka ngai a che” tih a ziak. 3-na Zalianthanga, Tahan niin “Thian tha” tih a ziak a ni.
Meichher Best Contributor of the Year 2023 pakhatna chu Mahmuaka Chhakchhuak, Chanmari Lunglei a ni a, article 6 a thawh. 2-na pathum an awm a, article 4 theuh an thawh. Familia Fanai Laltansanga, Zotlang Lunglei; Thansanga Chawngthu, Ramhlun Venglai Aizawl leh Ramhluna Hnamte, Zonuam Aizawl an ni. Article 3 thawhtu mi pathum bawk awmin 3-na an ni a; R Lalrawna, Electric Veng Aizawl; Rinfela Zadeng, Zobawk Venghlun Lunglei leh Zalianthanga, Tahan an ni.
Thlakip chhuak ‘Meichher’ hi a tirah chuan ‘Zoram Eng’ tia chhuah a ni a; 1975 March & April chhuah tan a ni. Tulna leh remchan zawkna avangin ‘Zoram Eng’ tih chu 1975 October thla chhuak atangin ‘Meichher’ tia thlak a ni a. 1975 March & April thla chhuak atanga chhiarin, January 2024 a tihchhuah tiamin bu 791 tihchhuah tawh a ni. Meichher hi sawrkar sum sengin a tir atangin thlatin bu 3000 zela tihchhuah niin, a thlawna sem thin a ni a. Editorial Board hranpa neiin, School Education director chu publisher a ni.