Meitei census neih tum thulh rih

Mizoram sawrkar nen an inbiak hnu ah Mizo Students’ Union-in Aizawla Meitei census neih a tum chu a thulh rih.
Inrinni tlai khan Home secretary H Lalengmawia chuan MSU Gen. Hqrs hruaitute a kawm a. Mizorama Meitei chungchanga hriat duh an neihte a sawipui.
Mizoram sawrkarin Manipur tualchhung buaina chungchanga hma a lak dan leh Zohnahthlak raltlante a chhawmdawl mek dan sawiin, khawtlang leh NGO-ten hemi kawnga sawrkar an thawhpui dan leh ke an pen chhuah dan chu ropui leh lawmawm a tih thu a sawi.
MSU hruaitute chuan Mizorama Meitei awm mek te chungchanga hriat duh an neihte hre tura hma lak an tum chu Mizorama Meitei awm mekte hnawhchhuah leh tihthlabar tumna niloin, an him zawkna’na ti a nih thu an sawi a ni.
Sawiho a nih hnu ah Mizorama Meitei awm chungchanga hriat duh an neih hre tura thil tih an tumah Mizoram sawrkarin an thil hriat duhte a hrilh theih dawn avang leh sawrkar hotuten an thil tum chu kaltlangpui lo tura an ngen avangin an thil tum hi bawhzui zel loh an remti a. Hemi chungchangah thil thar a awm anih chuan sawiho zel rem an ti.