Meitei-te huat rawn Zoramthanga

Manipur-a Meitei leh Zohnahthlak inkara buaina chhuak chungchangah Mizoram chief minister Zoramthanga’n Zohnahthlakte thlavang hauhna kawnga hma a lak nasat avang leh Manipur-a remna leh muanna a awm theihna tura ke a pen nasat avangin Meitei ho huatrawn leh beih a tawk nasa hle tih MNF Thalai chuan an sawi.
MNF Thalai hruaitute chuan chuan Manipur khawpui Imphal-ah Meitei nu ho leh an thalai pawl (Meira Paibis, Arambai Tenggol, Meitei Leepun nia hriat) chuan Mizoram chief minister lim leh thlalak hmun hrang hrangah halin, nasa takin an diriam tih an sawi a. Manipur University chhunga Meitei zirlaiten Pu Zoramthanga lim an hal bakah MNF-in Manipur-a Zohnahthlak unaute inrelbawlna hran (separate administration) a thlawp chu duh loin, All Assam Manipuri Youth Association hmalaknain Assam state hmun hrang hrangah Pu Zoramthanga lim hi an hal tih an sawi bawk.
“MNF president leh chief minister Pu Zoramthanga’n a mite a hmangaih avanga a tawrhna hi ropui kan tiin kan chhuang takzet a. NGO Coordination Committee hmalakna leh ruahmannaa Manipur-a kan unaute thlavang hauhna kawngzawh leh inkhawm Mizoram hmun hrang hranga hlawhtling taka neih a ni kha lawmawm kan tih hle bawk,” MNF Thalai vice president Zodinpuia chuan a ti.
Mizorama political party hrang hrang zingah UCC duhlohna thu a thlenna tur hmun diktak, Law Commission of India hnena thlen awmchhun chu MNF chauh nia an hriat thu MNF Thalai hruaitute chuan sawiin, Mizoram chu Pathianin Zofate Jerusalem ni tura a din a nih thu an sawi bawk.