Meitei-ten ‘Manipur’ tih paih duh loh lantir nan darkar 48 shutdown kalpui mek

Meitei-ten ‘Manipur’ tih paih duh loh lantir
nan darkar 48 shutdown kalpui mek
Meitei pawl hrang hrangte awm khawmna, Coordinating Committee on Manipur Integrity (COCOMI) chuan an state transport bus-a thu intara ‘Manipur’ tih inziak pawh thlak nia sawi duh loh lantir nan Nilaini zan zanlai atang khan darkar 48 awh tur state pum inkhar (shutdown) an kalpui.
Thawhlehni khan Ukhrul district-a ni nga awh tur, Shirui Lily Festival hawnnaa tel tum chanchinbumi, an khawpui, Imphal atanga kalte chuanna bus chu venhim hna thawktuten Gwaltabi, Imphal East district-ah an lo dang a, an lettir leh nia sawi a ni a. Mi thenkhat chuan Meitei-te chu kawngpui dung, ualau lo deuh laia beih an tawh mai an hlau bawk.
Governor Ajay Kumar Bhalla hnena lehkha an thehluhah Manipur Working Journalists Union (AMWJU) leh Editors Guild Manipur chuan venhim hna thawktute hian media team hnenah hian an chuanna bus hmaa ‘Manipur State Transport Corporation’ tih intar chu hliah turin an ti a. ‘Manipur’ tih bik chu thil charna hmangin an hliahsak niin an sawi.
AMWJU leh EGM chuan venhim hna thawktuten chanchinbumite leh Manipur mipuite zah lo taka an tihna duh loh lantir nan Nilaini khan ‘pen down protest’ an huaihawt bawk.
Nilaini vek khan Manipur sorkar chuan he thil thleng chhuitu tur mi pahnih awmna inquiry committee a din bawk a. Committee hi an thil hmuhte chu ni 15 chhunga thehlut tura tih an ni.
“Committee hian thil thlengte an chhui ang a, tih dik loh a lo awm a nih chuan a thlen nawn tawh lohna tura rawtna pawh an siam ang,” tiin Manipur Chief Secretary Prashant Kumar Singh-a’n hriattirna a chhuahah an tar lang.
Hmarchhak state-ah hian Meitei leh Kuki-Zo inkarah May, 2023 atang khan buaina chhuakin Chief Minister N Biren Singh-a a bân hnuah February 13 khan sorkar laipui chuan President’s Rule-ah a dah zui.
Buaina avang hian mi 260 chuang thi awm tawhin mi sang tel baihvaiin an la awm phah mek reng.
An state pangpar, Shirui Lily puala kût an hmanna hmun hi Kuki chenna, tlangram niin phaizawla cheng, Meitei-ten an chhim loh nan Kuki pawl thenkhat chuan vauna an lo tichhuak tawh a. Kût hman tuma kal Meitei-te chu an khua paltlang lo turin an ti a ni.