Meitei-ten ‘Manipur’ tih thup tum duh lohna lantir zel

Meitei-ten ‘Manipur’ tih thup tum duh lohna lantir zel
Manipur khawpui, Imphal-a mipui lungawi lo, Raj Bhavan pana kawng zawhte hnawh darh nana venhim hna thawktuten smoke bomb leh tear gas an hmannaah mi pariat velin hliam an tuar.
Heng mite hi tun hnaia Ukhrul Shirui Festival hmannaa kal tur Manipur State Transport (MST) bus -a ‘Manipur’ tih inziak tihlan loh tumna awm nia sawi duh lohna lantirtute an ni.
Meitei pawl hrang hrang telna, Coordinating Committee on Manipur Integrity (COCOMI)-in Khwairamband Keithel-a punkhawm an huaihawtah hian mi tam tak an tel a. metre 500 vel kawng an zawh hman tihah police-in an dang a. Venhim hna thawktute hian Kangla Western Gate bulah smoke bomb hmangin an hnawt darh ta a, hliam pawh an awm nual a ni.
Pungkhawmte hian sorkar bus-a an state hming lak thlak/thup tumna awmah Governor Ajay Kumar Bhalla-a ngaihdam dil an phut a. COCOMI hian state pumah lungawi lohna lantir leh chief secretary, director general of police (DGP) leh security advisor ban an phût.
Inrinnia thuchhuah an siamah darkar 48 chhungin governor-in ngaihdam dilna an phut tih an tar lang a, a hmain darkar 48 chhung lungawi lohna lantir tawhin Zirtawpni zanlai khan a tawp bawk.
“Governor hian a mite thil duh a ngaihven lo va. Amah leh a kaihhruai thuneitute hian kan state chanchin hlui leh hnuhma an zah lo va. Inquiry commission an din pawhin thil an chhui tha tawk lo va, a mawhphurtute pawh hremna pek an ni lo,” tiin lungawi lo zinga pakhat chuan a sawi.
COCOMI convenor Kh Athouba chuan venhim hna thawktute chet dan chu a dem thu a sawi a. “COCOMI hian tharum thawh lova lungawi lo, a bikin hmeichhiate laka smoke bomb leh tear gas a hmang hi a ngai thutak hle a. Hetianga mipui pungkhawm thunun tumna rawng tak hi a mipui rorelna sorkar kalhmang lo hle a ni,” a ti.
Tar lan tawh angin 5th Shirui Lily Festival hawnna chhim tuma Ukhrul-a kal chanchinbumite chuanna MST bus chu May 20 khan tih din niin bus-a ‘Manipur’ tih inziak chu thup tura tih an ni a, hei hi Meitei pawlte lungawi lohna ber a ni.
Pathiannia COCOMI huaihawta pungkhawmnaah hian hmeichhia telin mi pariat velin hliam tenau an tuar a, a bul hnai damdawi inah hruai an ni.
Athouba chuan COCOMI hian governor-in ngaihdam a dil hma loh leh sorkar hotu liante a sawn hma loh chu lungawi lohna an lantir zel dawn tih a sawi a. Buaina siam lova pungkhawmte laka tharum hman chu titawp nghal turin a phut bawk.
Manipur hi Meitei leh Kuki-Zo inkara May, 2023 atanga buaina chhuak avangin hnam hnih inkarah boruak a tang hle a. President’s Rule-ah awm mekin chi leh chi inkarah buaina avangin mi 200 chuang an thi tawh a ni.