Meiteiho hneh hnuah Madhya Pradesh tum leh dawn

Meiteiho hneh hnuah Madhya Pradesh tum leh dawn
Jharkhand khawpui Ranchi-a National Women’s Hockey League 2025 (Final Phase) khelh mekah Mizoram chuan karliamta Zirtawpni khan sili faia Manipur sawpin, Inrinni tlai khan an match thumnaah sikhat faiin Bengal an hneh leh a; tukin zing dar dar 8:15 hian Madhya Pradesh an hmachhawn leh ang.
Meiteiho laka Mizo team goal khatna kha second quarter minute 27-a Vanlalrinhluii (Durtlang) thun niin, tun tournament kal laia chetha em em West Bunghmun star B. Lalrinpuii chuan an goal hnihna a thawh a, player of the match-a thlan a ni zui nghe nghe.
Tournament thlengtu team Jharkhand lakah pawh Rinpuii hian goal hnih a lo hlap lut tawh bawk a ni.
Mizoram goal thumna hi Durtlang tleirawl dang Manglawmsangi tihluh niin, heti chinah hian Durtlang hming a la tawp mai lo a, Manipur laka Hockey Mizoram goal lina leh 4-0-a Meitei-ho an sawpna goal ni zui ta pawh hi Durtlang tleirawl tho K. Vanlalpeki (Apektei) khung a ni.
Inrinni tlai dar thum khan an match linaah Hockey Bengal tum zui lehin, sikhat faia Bengal an hnehna goal awmchhun hi minute 41-na (3rd quarter)-a Manglawmsangi tihluh niin, tournament kal laiah Mizo team tan Durtlang player-te’n an thawhhlawk hle a ni.
Bengal lakah hial goal khung zo lo mah se jersey no. 5 Lalbiaksiami (Lunglei Electric veng) chu player of the match atana thlan loh theih lohin a khel tha.
Hockey Mizoram hi Pool A-ah a thlengtu Jharkhand, Haryana, Odisha, Madhya Pradesh, Maharashtra, Bengal leh Manipur-te nen an awmho a; he league kal lai hi March ni 28 thleng awh tur a ni.