ISL hma lam hun tur a chiang thei lo

Last updated Jul 17, 2025 8 0
India ram chhunga football club te inelna lian leh sum tamna ber Indian Super League (ISL) 2025 - 26 khelh theih a ni dawn em tih a la chiang thei lo reng. ISL chungchangah AIFF hotuten engtin nge hma an lak dawn tih chu zawhna awm mek leh ngaihven hlawh tak a ni.
Indian Super League khelh theih a nih chhan ber ootball Sports Development Limited (FSDL) lamin cotract ziah belh pui tumna an nei si lo a, Player te leh Football ngainatute rilru a máng rih viau. 
FSDL hi Football Sports Development Limited tihna a ni a. September ni 2, 2013 khan din a ni a. All India Football Federation (AIFF) nena thawk dunin Indian Super League hi khelh tan a ni a, ISL khelh theih nana sum thawhtute ber an ni. He Company hi Reliance Industries, IMG (International Management Group) leh Starsports te tangkawpin an din a. Reliance Industries hian 65% share neiin Starsports hian 35% share a nei a, an hotu ber chu Nita Ambani a ni. AIFF hian ISL kalpui tur hian sum mamawh an nei lo a, FSDL rinchhan hian ISL an khel thei ve chauh a ni 
FSDL leh AIFF hian kum 15 chhung inremna thuthlung MRA (Master Rights Agreement) an ziak a, he an inremna hi kumin December ni,  2025 hian a tawp tawh dawn. An contract a tawp dawn hnai tawh a, contract thar ziak turin inremna an la nei rih bawk si lo hi tuna buaina ber chu a ni rih. 
FSDL leh AIFF te’n Master Rights Agreement an ziahah chuan “FSDL hian kum tin Cheng vaibelchhe 50 an pe ang a, ISL-ah hian theh darh / tih lar kawngah te, hlawkna hmuhna tura ruahmanna siam bakah he intihsiakna enkawl zel kawngah leh Indian National Team thlenga thuneihna an nei thung ang” tiin thu dehkilh an dah a ni. 
MRA thar ziah kawngah FSDL leh AIFF te hi an thu a in hmuh thei lo a, a chhan langsar zual te: ISL kaltlanga sum lakluh insem kawngah FSDL hian a hma aia chan tam an duh a, AIFF lam pawhin an lo beisei ve bawk si. ISL kalphunga thu neihna chan kawngah an thu a in hmu thei lo leh zel a. ISL tan hmathlir an neih danah FSDL leh AIFF ruahmanna a in persan hle a; AIFF hian sum hmanga inremna awm tawh lo in Club 16 khelh theih tura League kalpui an duh a; neitu nihna 20% chan ve an duh te chu FSDL lam hian an pawm thei lo. FSDL lam ruahmannaah ve thung chuan ISL Club hotute leh AIFF lam aiawh te bakah anmahni lam aiawh te telin ISL enkawltu tur Company hran din an duh ve thung.
Hengte a nih nuaih avang hian Master Rights Agreement hi an ziak thei ang em tih a la chiang thei lo tluangzel a, ISL hi a tawp mai dawn nge AIFF hian a kaw tawpah tangin FSDL duhdan leh ruahmanna te a pawm mai dawn nge? Changtlung lo takin ISL a kalpui hram dawn tih chu hunin a rawn hril thung dawn a ni.
Indian Football ngainatu tamtak chuan AIFF hi thiat vek se, FSDL hian Indian Football hrim hrim enkawl vek se ti pawl an awm ve bawk. Mizo player tam takte khelh mekna leh an hlawhtlinpui ISL hma lam hun tur a chiang lo mek zel a. He buaina awm mek hi engtikah nge chin fel a nih ang tih a la chiang thei rih lo.
Indian Super League rawn lan hma leh ISL khelh tirh lamah kha chuan Indian I League hi India tam tualchhunga inelna lian ber a ni reng thin. ISL khelh chhunzawm a nih loh chuan I League tihlen a nih a rinawm a. ISL angin boruak neih erawh a harin a rinawm.