Mel-3 Trinity Hospital thlanga leimin thlentu hna tih tawp tir

Melthum Silai Muala Trinity Hospital thlanga phalna mumal nei loa lei laihin leimin nasa tak a thlen avang leh chhiatna tam tak a thlen avangin, he lei laitu David Lalhmangaiha, Chanmari Aizawl chu a hnathawh mek titawp tura hriattir a ni.
Sub divisional magistrate Aizawl Sadar Sub-Division-in hriattirna a tihchhuah danin, David Lalhmangaiha hian Trinity Hospital thlang lamah thuneitute atanga phalna mumal awm loin lei a lai tih tarlan a ni a. Hei hian May 28 khan leimin a thlen phah a, he leiminah hian Assam type in pakhat a tichhia a, RCC building a tichhe bawk. Trinity Hospital transformer hman mek a tihchhiat tel avangin damdawi in hian eng an neih loh phah tih sawi a ni.
David Lalhmangaiha hi a hnathawh lai mek tawpsan tur leh a tihchhiat zawng zawng senghawi turin hriattir a ni a. Link road bulthutah retaining wall siam tura tih a nih bakah in a tihchhiat siamtha leh turin ni 30 chhung hun pek a ni.
Hetih lai hian Trinity Hospital medical director Dr K Lalbiakzuala chuan thuchhuah siamin, transformer dahna hnuai kawngko laih avanga leimin leh Cyclone Remal-in a ken ruahsur avangin damdawi in power supply khaihlak thulhah ICU-a damlo pahnih chu Ebenezer Hospital-a sawn an ni tih a sawi a. Damdawi in building erawh hlauhthawnawm a ni lo tih a sawi a ni.