Mel Gibson leh Paris Hilton te in a kang

Mel Gibson leh Paris Hilton te in a kang
Hollywood star Mel Gibson chuan Los Angeles kangmei chhuakah Malibu-a an in a kang ral vek niin a sawi a, Joe Rogan-a podcast The Joe Rogan Experience atan shooting an neih laiin kum 15 a lo luah lum tawh, an in chu a lo kangfai vek a ni.
Los Angeles kangmei a chhuah tan lai khan Mel Gibson, kum 69, hi Austin, Texas-ah The Joe Rogan Experience episode film turin a thlawk lut a, an chenna in kangmeiin a man dawn hnaia a lan hnuah a kawppui Rosalind Ross leh a fapa Lars, kum 7, te chu an tlan chhuak hman a ni.
Gibson chuan, “Actor Ed Harris, kan thenawm lawka cheng pawh an in a kang fai vekin ka hria. Kan kawtthler ka thian dang tam tak te chenna te, kan lirthei leh an thil neih zawng zawng chan vek an tam mai. Hetiang khawpa kangmei thawkna hi ka la hmu ngai lo,” a ti.
Paris Hilton chenna in, a pasal Carter Reum leh an fate pahnih nena Malibu-a an chenna pawh a kangral vek a, Paris chuan, “Kan in ni thin meivap a changtaah ka ding a, rilru nat dan chu sawi ngaihna a awm lo. Ka thinlung hi maktaduai tam takah a kehsawm a ni ber mai,” a ti.
“In chu kan chenna a ni ringawt lova, kan duhthu kan sam hona te, chhungkua hlim taka kan nuihhona te leh hun hlimawm leh duhawm tam tak kan lo hman tawhna a ni. Meivapa a chang ta mai han hmuh chu thu a sawichhuah ngaihna pawh ka hre lo,” a ti bawk.
Pacific Palisades kangmei chhuak hian a kal kawnga thil awm chu a kangfai duak zel mai a, kangthelh pawl ten theihtawp chhuah mah se thelh hleihtheih a ni tlat lo. Chenna in chân zingah milar pawh an awm nual a, Spencer Pratt leh Keidi Montag te chenna in pawh a kangral vek.
Actor Sebastian Harrison, kum 59, pawh Malibu-a a chenna in a kangral vek a, ani phei hi chu a pa, kum 89 mi a awmpui lai niin, kangmei laka a pa a chhannaah tuipuia zuan luh mai a ngai hman tep niin a sawi. Milar dang Anna Faris, Milo Betimiglia leh Billy Crytal te pawh he kangmei chhuak avanga chenna in chân mi tam tak zingah an tel.