Melbuk an kal zel, Kolasib an chak

GIG Motors All Mizoram Inter Village Football Championship 2024 khelh mekah December ni 2, Thawhtanni khan khelmual pahnihah Round of 16 khelh a ni a, inkhel vawihnih ve ve awmin Kolosib Jt VC, Bethlehem Vengthlang LC, Melbuk VC leh Armed Veng LC te chuan an khingpui theuh hnehin Quarterfinal an lut. Last 16 hi vawiinah khelh zawh a ni ang.
Kolasih Jt. VC 5-0 Republic LC
RG Stadium-a inkhel hmasa zawkah Aizawl-a football thiam veng Republic in Kolasib Jt. VC an hmachhawn a, si nga fai ngawta tlawmin quarter-final an lut zo lo.
Kolasib Jt VC hi Republic LC lakah an khel tha viau a, chawlhlawk hmain goal thum ngawt an thun hman. Kolasib Jt VC tan hian Isaak Malsawmkima chuan inkhel tan atanga minute rukna lekah hmahruaina goal a thun nghal. Hma takah goal an thun vangin an phur a, Aizawl Veng lian lakah inrintawkna sang zawk nen an inlan zui theih phah.
Hma takah goal lut nghal mah se goal lut a awm belh thei lawk lo thung. Goal lut a awm belh lawk loh hnu chawlhlawk dawn hnaihah Kolasib Jt VC in goal hnih an thun belh leh. Minute 35-naah William Lalnunfela chuan an goal hnihna a thun a. William Lalnunfela goal thun atanga minute li hnu lekah Paul Ramfangzauva chuan an goal thumna a thun belh zui leh nghal zat a, si thum faia hmahruai chungin chawlhlawk an hman theih phah.
Chawlhlawk hnu lamah Republic in an si phurh sut tum viau mah se goal an thun thei lova, hun tawp dawn hnaiah goal an chhuah belh leh ta thung. Kolasib Jt VC tan hian PC Pazawna chuan an goal lina thunin an hmahruaina a tizau a. Hun pek belh minute 90+1 naah Samuel Lalruatfela chuan an goal ngana thunin a tawp a khar a, phu takin quarter-final an lut zui ta a ni.
RG Stadium-a inkhel dangah Bethlehem Vengthlang LC leh Salem Veng LC
team te hun pangngaiah goal awm lovin an inhnehtawk a, Penalty Shootout-ah Bethlehem Vengthlang LC chuan 3-2 a hnehna changin quarter-final an lut ve bawk.
Melbuk an kal zel
1st Bn MAP Ground, Armed Veng
a inkhel hmasa zawkah Champhai District a ball thiam khua Melbuk chuan Aizawla football thiam veng Durtlang an hmachhawn a, tie-break ah vannei zawkah tangin quarter-final an lut.
Melbuk VC team hian Durtlang LC team laka bul an tan tha viau a, inkhel tan atanga minute rukna lekah Lalliansanga goal thun hmangin hma an hruai. Hma takah goal chhuah mah se Durtlang an buai lova, minute 45+2-a Lalsawmzela goal hmangin an si phurh an sut. Chawlhlawk hmain goal khat ve ve thun bawk mah se chawlhlawk hnu lamah goal an thun belh thei lo ve ve a, penalty shoot-out hmangin thelh an ngai. Tie-break-ah hian 5-4 in Melbuk an vannei a, quarter-final an inhlangkai.
1st Bn MAP Ground a inkhel hnuhnung zawkah home team Armed Veng LC leh College Veng LC te an inhmachhawn a, hun pangngaiah 3-3 a an inhnehtawk hnuin penalty shoot-out ah Armed Veng LC an chak.
GIG Motors All Mizoram Inter Village Football Championship 2024 khelh mek hi vawiinah last 16 khelh zawh a ni dawn. RG Stadium, Mualpui
-ah Ramhlun North LC leh Chanmari LC te an inkhel hmasa ang a. Bawngkawn LC leh Zemabawk North LC te an inkhel zui ve leh ang. 1st Bn MAP Ground, Armed Veng-ah Sihphir Venghlun VC leh Tlangnuam LC te an inkhel hmasa ang a.
Lengpui VC leh Chhinga Veng LC ten last 16 match hnuhnung ber an khel ang a, quarter-final lut a hriat kim theih chiah ang.