Meloni leh Xi inhmu

Chinese President Xi Jinping leh Italian Prime Minister Giorgio Meloni te chuan Ukraine indona leh Middle East crisis te Beijing khawpuiah sawi dunna an nei tiin Meloni’s office chuan a tarlang.
Meloni G7 presidency chelh mektu niin Xi Jinping nena inbiakna an neihah hian khawvela buaina leh harsatna hrang hrang thleng mekah China chu thawhpui atana pawimawh a ni a ti a.
Ram pahnih hruaitute chuan khawvel huap pawha thil pawimawh hrang hrang Ukraine indona thleng mek chungchangte Middle East-a buaina inmun zel te an sawi dun a. Chumai bakah Indo-Pacific a boruak sang zel te pawh an sawi dun tiin Italian leader’s office chuan thuchhuah an siamah tarlan a ni.
Nikuma Xi flagship Belt and Road Initiative atanga Italy a inhnuhdawh hnuah Meloni chuan Beijing nena economic lama inzawmna tha neih leh zawk a duh a. Hetih lai hian Khawthlang ram te leh khawvela economy lian ber pahnihna te inlaichinna chu a tlahniam zel bawk.
“International level ah himlohna a nasa zel a, heng harsatna hrang hrang te chinfel a nih theih nan hian China hi palai pawimawh a ni tlat a ni” tiin Meloni chuan Beijing a Diaoyutai State Guest House a thusawina a neihah a sawi a.
Meloni chuan Beijing awn ringawt aimahin sumdawnna lam kaihhnawih chu a ngai pawimawh zawk tih a thusawiah a lang bawk a.
“Italy chuan European Union leh China inlaichinna chungchangah pawimawhna thuktak a nei thei a, trade relations inbuktawk tha tak a awm a ngai a ni,” tiin a sawi.
EU trade policy chuan tun hnaiah China production-focussed development model hmangin Chinese firm ten ram chhunga demand hniam zelah man tlawm zawkin ram dangah an thil siamte thawndarh hlauhna an neih avangin khuahkhirhna an kalpui a ni.
European Commission chuan tun thla tir lam khan China a electric vehicles siam te lakah chhiah 37.6% an lak tur thu an puang a, chu chuan Beijing nena inlaichinna a tichhe zual lo thei lova ngaih a ni bawk a. Chinese official te chuan trade war a thleng thei tia an vau chungin Brussels chu a khauh tlat bawk si a ni.
Italy chu China tana pawimawh tak a ni thei a, European bloc ah pawh China kaihhnawihah moderator ni thei a ni bawk a.
Kum 2019 khan Italy chu Group of Seven industrialised democracy ram zinga Xi Jinping a Belt and Road Initiative, tun hmaa Silk Road trade route tharthawhlehna zawm hmasa ber a ni a.
Mahse nikum khan US nawrna avangin Italy chuan Belt and Road Initiative chu a chhuahsan leh a. Mahse, Rome chuan Asian giant China nena trade ties tha zawk neih duh thungin three-year action plan pawh Pathianni kalta khan an siam a ni.
“Ram pahnih ten hmasawnna an neih dun theih nan hun pawimawh tak kan hmachhawn mek a ni” tiin Xi chuan Meloni hnenah a sawi a. “China leh Italy chuan Silk Road spirit kalpuiin tichuan Khawchhak leh Khawthlang te inpawhna siam a ni ang a, bungtharah min chuankaipui ang,” tiin Xi Jinping chuan a sawi