‘Members only’ hrethiam telh telh

Radio hun lai a awm a, video hun a awm, TV hun a awm, tunah chuan youtube hun a rawn inher a, ram hrang hranga mipuite en ber chu youtube a ni awm e.
Youtube-ah hian mi tu pawhin video an dah thei a, a duh duhina an lo en atan mi tinin video an dah thei. Man chawia en theih chi a awm leh a, member-te tan chauha en theih chi a awm. Man chawia en theih chi hi Mizoramah pawh a pung a, member-te tan chauhva en theih chi pawh a awm ta nual.
Youtube lama entu ngah FTH pawhin member-te tan chauhva en theih chi hi an nei thin a, mipuiin an hrethiam telh telh a, an pawm telh telh an ti.
FTH hian member-te tan chauhva en theih (members only) an neih pakhat FTH Zirtawp Zan tih a nei a, FTH channel subscriber-te’n man chawia an en theih tura an tih a ni. Mi lawm a hlawh a, entu pawh an pung.
“Mipui hian man chawia en theih chi hi kan pawm telh telh a, kan hrethiam telh telh a. Kan Zirtawp Zan show pawh hi kan phu lohvin mipuiin an lo ngaihlu a, ‘members only’ a ni a, mipuiin an pawm khawp mai,” FTH hotupa Mapuia chuan a ti.
“Tun hmain LPS leh Zonet-ah ‘members only’ hi a awm thin a, youtube rawn lar hnuah pawh ti an awm thin a. Keini pawhin kan han ti ve leh a, kan tawn ve chinah hian mipuiin an pawm telh telh. A tir lamah kha chuan youtube hi duh duha a thlawna thil en theihnaah kan ngai thup a, man chawia en theih chi han dah pawhin sawisel thawm a ring thin a. Tunah chuan kan hrethiam tawh khawp mai,” tiin a thlir dan a sawi.
“Ka hmuh chian em em chu, members only kan han tih hian, kan member-te an hlim a, man chawia entute hian an hlimpui,” a ti bawk.
“A thlawn veka tih sen a ni lo a, ram hausaah pawh mi hausa zawkte pawhin an tlin lo. Miin sum leh hun sengin theihtawp chhuahin show te, video te an siam a, chu chu kan en duh a nih chuan man chawia en hi kan tum ve tur a ni tih hi khawvela ngaihdan awm reng a ni,” a ti a, “Chanchinbuin man a nei a, lehkhabu hi a ziaktute’n an sem ngai lo. Youtube-ah pawh miin eizawn nan a hmang a nih chuan man chawia en theih tura a tih a ngai,” a ti bawk.
Mapuia hian social media-ah mi video ruk a hluar a, hei hi harsatna lian a tling tih a sawi. “Hah takin video kan siam a, kan hahpui a, kan inseng a, chu chu miin an duh dan danin an lo tidarh a, a siamtu tan chuan lawmawm loh tak a ni. Kan mihringpuite kan zah avang pawhin hetiang hi insum a tha khawp mai,” a ti.
“Video kan nei lo a nih chuan social media-ah hian dah tur kan nei lo tihna a ni mai a. Video ka nei lo a nih chuan youtube channel-ah dah tur ka nei lo a ni mai. Chu chu kan pawm duh lo a, mi ta kan ru a, a neitu tan a na lutuk. Sapho pawhin na an ti a, khawvelin hetiang hi a pawm lo,” a ti bawk.