Memphis Grizzlies an chak

Nilai zing khan NBA khelh chhunzawm a ni a, hliamin a tihbuai nasat Memphis Grizzlies chuan Dallas Mavericks an hneh nawlh. Inkhel dangah tunhnaia khel tha lo Los Angeles Lakers chuan inkhel hmuhnawm takah point khatin Toronto Raptors an hneh thei hram.
Hliam vanga an player pasarih ngawt chhawr thei lo Memphis Grizzlies hian Dallas Mavericks lakah an khel tha viau a, quarter hnuhnung berah an hnufual zeuh tih loh chuan quarter dang pathumah an chungnung vek. Quarter hmasa berah point sarihin chungnung zawkah an tang a. Quarter hnihnaah point riata chungnung zui lehin, point 15 zeta hmahruai chungin chawlhlawk an hmang.
Chawlhlawk hnu lamah Grizzlies an khel tha chhunzawm a, quarter thumnaah point 5 in an chungnung zui leh a. Quarter hnuhnung ber an hmachhawn dawn meuh chuan point 20 zetin an sang fal tawh a, chak tur a chiang tawk viau tawh ngaih a ni. Quarter hnuhnung berah hian point thumin Dallas Mavericks an chungnung ve hram a, an inkar tizim deuh mah se point 17 in hnufual zawkah an tang ta tho a. Hliamin a tihbuai nasat Memphis Grizzlies hian point 120-103 in Dallas Mavericks an hneh zui ta a ni.
Tarlan tawh angin Memphis Grizzlies hi hliamin a tibuai nasa viau a, an player pasarih ngawt an chhawr thei lo mek. An player pawimawh Ja Morant chu dar hliam vangin tun season chhung chu an chhawr thei tawh dawn lo. Mavericks lakah hnehna an chan tum hian Grizzlies tan Desmond Bane chuan point 32 a thawkchhuak.
Thawhleh zing hian Los Angeles Lakers leh Toronto Raptors ten inkhel hmuhnawm zet mai an lantir a. Inkhel hmuhnawm zet maiah hian LA Lakers in point khatin hnehna an chang thei hram. Point 132-131 a Raptors an hneh tum hian Lakers tan Anthony Davis tan point 41 a thawkchhuak a. An player pawimawh LeBron James pawhin point 22 a thawkchhuak ve bawk.
Inkhel dangah Western Conference hmahruaitu Minnesota Timberwolves chuan point 113-92 in an khingpui Orlando Magic an sawp. Timberwolves tan hian Karl-Anthony Towns chuan point 28 a thawkchhuak a, French international Rudy Gobert chuan point 21 a belh ve bawk. Thawhleh zing hian New York Knicks leh Sacramento Kings ten hnehna an chang. Kings laka tlawm Detroit Pistons an khel chhe chhunzawm viau a. Season kal mekah vawi 34 an tlawm der tawh.