Inrinni zing khan Major League Soccer khelh chhunzawm a ni a, Inter Miami tan Lionel Messi a chetha chhunzawm a, goal a thun tluang zel. Nashville SC laka goal hnih thun Messi hian MLS-ah record thar a siam.
Lionel Messi an neih hnua club tha thar tak Inter Miami hian Chase Stadium-ah Nashville SC an mikhual. An mualah bul an tan tha viau a, goal pawh an thun thuai. Inkhel tan atanga minute 15-na lekah freekick an hmu. Free kick hi Lionel Messi chuan lei hrulah fing, mawi leh fuh zetin a chhuih goal a, hmahruaina goal a thun. Footballer ropui ber Messi hian a uaithlak lamah freekick a chhuih goal thei hle. Kum 2018 atanga chhiarin, penalty aiin freekick atangin goal a thun hnem zawk. Kum 2018 atang inrinni zing thleng khan freekick vawi 35 a chhuih goal tawh a, hemi chhung hian penalty vawi 30 a pet goal thun. Messi-a’n club leh ram tana freekick a chhuih goal zawng zawng hi vawi 69 lai a ni nghe nghe a ni.
Minute 16-na lekah hmahruaina goal thun nghal mai mah se Inter Miami in goal an thun belh mai thei lova, second half tir lamah goal an chhuah ta zawk. Mikhual team Nashville SC tan hian Hany Mukhtar chuan minute 49-naah goal thunin an si phurh a sut. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Inkhel hmuhnawm takah hian Messi chuan minute 62-naah Inter Miami hmahruai nawn lehna goal a thun. Messi goal thun hi hun tawp thlengin an venghim a, an mualah 2-1 a hnehna changin point thum an hmuh belh.
Ballon d’Or vawi riat ngawt dawng tawh Messi chu MLS lamah a vul thar leh a, MLS-a inkhel a hmachhawn vawi 16 atangin goal 16 ngawt a thun tling. Messi hian MLS a hmachhawn hnuhnung vawi ngaah goal hnih a thun vek a, khelh nga chhunga goal hnih thun vek thei awmchhun niin MLS record thar a siam. Fifa club World Cup an hmachhawn hma ata tawh Messi hi a chetha chho hle. Khawvel huap inelna lianah last 16-a an khingpui PSG hneh lova an tlak hnuin MLS lamah a chetha zui leh nghal zat a, goal a thun thei chhunzawm. Messi hian MLS-a an khingpui hnuhnung panga, Montréal, Columbus, Montréal, New England leh Nashville SC te lakah goal hnih theuh a thun. Tunhnaiah a chet that chhoh em vangin 2026 World Cup-ah pawh tha taka a inlan theih ngei beiseina a sang hle.
Major League Soccer season kal mekah Inter Miami hian khelh hmabak khelh thum an la nei a, Eastern Conference-ah pangana an ni mek a, hmahruaitu Philadelphia nen an inkarah point nga tla zep mek a ni. Eastern conference champion nih theihna hun tha an la nei a, an khelh hmabak pathumah an chetthat tluan a ngai dawn thung. Khelh hmabak pathum an la neihah chak vek tumin tan an khawh zui dawn. Tunhnaiah Lionel messi a chetthat leh zual vangin Inter Miami an phur a, conference champion nih theih beiseina sang tak an nei mek bawk. Hmahruaitu Philadelphi lehpelh ngei tumin thih thah an thawh zui ang.
Get real time updates directly on you device, subscribe now.
Next Post