Messi an hnawl a maw?

Football a mimal chawimawina sang Ballon d’Or 2024 dawng thei tur chhawpchhuah a ni a, mi 30 zingah Lionel Messi a tel ve lo. Ballon d’Or dawng tura rinkai zual 30 zingah Lionel Messi a tel lo hian sawisel a hlawh a, Europe a inkhelte chauh tan Ballon d’Or dawn theih anga ngaihna lian tak a awm.
Ballon d’Or vawi riat ngawt dawng tawh a, che chawimawina dawng hnem ber ni mek Lionel Messi hian Paris St-Germain chhuahsanin Inter Miami a pan. USA lamah a kal hnuin club leh ram tan che chhe lem lo mah se Ballon d’Or dawng thei tur mi 30 zingah a tel tlat lo thung. Messi hian Major League Soccer club Inter Miami chu League Cup-ah a vawi khat nan a champion pui a, a club thar hi trophy a lakpui nghal. League Cup-ah Inter Miami a champion pui bakah Argentina chu Copa America 2024-ah a champion pui leh bawk a, trophy pahnih nen season a khar.
Inter Miami tan match 29 atanga goal 25 thunin, Argentina tan 2023-25 season chhungin vawi 12 a khel a, goal 8 a thawkchhuak bawk. Argentina tan hian inelna dang leh Copa America-ah a chetha viau a, an player pawimawh a ni. Copa America khelh zawh takah khan team of the tournament-ah thlan tel a ni bawk. Club leh ram tan trophy a la ve ve chunga Ballon d’Or dawng thei tur mi 30 zingah telh a ni lo hian Europe bias zia a tilang nia ngaih a ni.
Lionel Messi-a’n club leh ram tan trophy pahnih chawi chungin Ballon d’Or dawng thei tur mi 30 zingah a tel phak loh laiin trophy chawi nei miah lo Declan Rice, Bukayo Saka, Martin Odegaard leh William Saliba te an lang nawlh thung. Club nei lova awm mek Mat Hummels pawh mi 30 zingah a lang tel ve bawk a, Hummels hian Borussia Dortmund tan champions league final a khelh bak hnuhma lian hnutchhiah a nei lo. Germany hian Euro 2024 an thleng a, Germany squad-ah hian Hummels hian hmun a chang phak lo hial nghe nghe. Chuti chung chuan Ballon d’Or dawng thei tur zingah Lionel Messi aiin hmun pawimawh a chang zawk hlauh thung.
Ballon d’Or dawng thei tur mi 30 chhawpchhuah zingah hian La Liga-a top-scorer ni nawlh Artem Dovbyk pawh a lang. La Liga-ah goal 20 thun a, top-scorer ni ta Artem Dovbyk hi Girona tan chetha viau mah se trophy lak a nei lo. Mi 30 zingah hian Paris St-Germain tan vawi 28 chauh khel Vitinha pawh a tel nawlh bawk. Rin loh taka Vatinha te an tel nawlh laia Lionel Messi tel ve si lo hian Ballon d’Or hi khawvel huap nge a nih a Europe khawmual chauh huap tih zawhna a siam tam hle.
Messi rual hian Ballon d’Or dawng thei tur mi 30 zingah he chawimawina vawi nga lo dawng tawh Cristiano Ronaldo a tel lo bawk a. Kum 19 zet hnuah Ballon d’Or dawng tura rinkai zual zingah Lionel Messi leh Cristiano Ronaldo te zinga pakhat zawk zawk an tel loh vawi khatna a ni. Mi 30 zingah Messi a tel lo in mak tih a hlawh a, Ronaldo tel lo erawh in mak tih a hlawh viau lo thung a, vuipuitu pawh an tam tehchiam lo.
Cristiano Ronaldo hi Asia khawmuala ram ropui Saudi Arabia club lian Al-Nassr tan a khel. Season liam ta khan Al-Nassr a zawm hnuin inelna hrang hrangah vaiw 62 a khel a, goal 68 zet a thun. Club leh ram tan che chhe lem lo viau mah se, Portugal hi Euro 2024-ah a ropui pui zo lova, trophy lian lak a nei lo. Saudi Pro-League lamah goal thun thei viau mah se Saudi Pro League lama chetthat hi Ballon d’Or dawn phah em nan chuan dah san a ni rih lo bawk.