Messi autograph dil vanga hrem tawk Mexican referee!

Messi autograph dil vanga hrem tawk Mexican referee!
Referee-te meuh pawh Lionel Messi ngaihsan kawngah an inthup zo ta thin lo a; karliamta Nilaini zan CONCACAF Champions Cup first round first leg match pakhata Inter Miami-in Sporting Kansas City an hneh tuma Messi hming sign diltu referee Marco Antonio Ortiz chu CONCACAF lamin hremna an pe!
A tirah tak chuan he referee hian Messi jersey a dil niin a lang a, mahse, a hnuah chuan a chhungte mamawhna avangin autograph a dilsak leh ta zawk niawmin a insawi a, mahse, hei hi referee-te tih loh tawp tur a nih avangin hremnain a umzui ta tho a ni.
Sikhat faia Miami chakna inkhel a ham tawp rualin second-half goal ropui khungtu Argentina international kha ‘El Gato’ tia hriat lar referee chuan panin, Messi kawr kha a dil hmasa phawt niin a lang a, mahse, a chhungte’n an thlakhlelh em avangin autograph a dil zui leh ta si zawk niin a lang!
Ortiz-a chet dan kha official-te khawsak dan tura an ngaih loh avangin North American football thuneitu sang ber CONCACAF lam chuan an hnuaia referee a nih angin thunnunna an lek khum ta tho a, thuchhuah siamin:
“Chhuichian a nih hnuah CONCACAF hmuh danin referee khan an chhungkaw member pakhat tan player hnenah autograph a dil a, referee chet dan kha confederation code of conduct-in match official-te chet dan tura a beisei a ni lo,” tiin an tarlang.
Eng ang tak hremna nge pek a nih erawh tarlan a ni lo a; CONCACAF thuchhuah vek hian Ortiz chuan a chet danah mawh a phur pumhlum tih a pawm nia sawiin,kalphung a bawhchhiat avangin ngaihdam a dil tih an tarlang tel nghal bawk.
North America khawmualpui huap club inelna lian ber first round first leg-ah hian North America, Central America leh Caribbean club-te an inel mek a; he lai bawra thlasik thlipui tleh thei tur hmuhlawk avangin a khelh hun hi an sawnhla nghe nghe.
Messi khelhna Inter Miami hian naktuk return leg-ah Sporting hi Chase Stadium-ah an mikhual ve thung dawn a ni.