Messi goal hmangin Miami kutah MLS Shield

Nimin zingah MLS Supporters’ Shield inchuhin Inter Miami leh Columbus Crew an intum a, Lionel Messi goal hnh leh Barcelona khuaa a thenawmpa ni thin Luis Suarez-a goal khat tihluh hmangin Crew lakah 3-2-in Miami an chak hram.
Argentina playmaker Messi hian goal hmahruai a thun hnu first-half hun pekbelhah free-kick hmangin sihnih faia mikhual team hmahruaina goal a chhuihlut leh.
Ohio lama inkhel lianah hian mualneitu team-in second half-ah an siphurh sut ngei tumin thapui an thawh a, Crew winger Diego Rossi chuan an thawhrim rah sengin an siphurh pakhat zawk a sut then ta reng a, mahse, Liverpool striker Suarez chuan Inter Miami goal phai a chhungkhat zui leh.
Home team bei-dawng duh lo tan penalty atangin Cucho Hernandez chuan goal khat tilut ve leh mah se Columbus Crew hian goal khata an la hnufualna erawh an thawmphui zo ta ngang lo a, an club chanchina a vawikhatna atan Inter Miami kutah Supporters’ Shield a lut a, away hnehna avang khan table-ah top an nih theih phah ta bawk.
Standing-a a sangber dinhmun an luah phak manah Miami hian post-season play-offs lamah home advantage an chang thei dawn a ni.
Inter Miami hian an league match khelh tur la neih hnuhnung pahniha hnehna an chan ve ve chuan MLS record thar siamin regular season-a point rut hnem thei ber an ni dawn a, tun dinhmuna record kawltu chu kum 2021-a point 73 hmu tling New England Revolution an ni.
MSL club zinga best regular season record neitu kuta an hlan thin he Shield hi kum 2020-a MSL an luhchilh hnua Miami kuta a luh vawikhatna a ni.
Club leh ram tana hlawhtlinna awm thei zawng zawng hui kim tih theih Messi tan kha trophy kha a career-a a 46-na niin, Barcelona lama trophy engemaw zat a lo chawipui tawh thin Suarez, Sergio Busquets leh Jordi Alba-te nen America leilungah trophy an lawmho leh ta a ni.
Miami captain Messi chuan hnehna an chan hnuah US a thlenthlak hnua a hmachhawp hmasaber a hlenchhuah tak thu sawi chungin a dawtleh lam a thlir mek tih a sawi.