Messi goal khatin Miami tlawm tur chhan zo lo

Lionel Messi chuan goal khung mah se an mikhual Atlanta United lakah 3-2-in Inter Miami an tlawm a, MLS Cup play-offs first round an paltlang zo lo.
Best-of-three tura an intum hmasak vawihihah team pahnih hi vawikhat ve ve chakin, Fort Lauderdale, Florida-a tlang zawk tur hriltu game pawimawhah Miami an tlawm ta a ni.
Inter Miami hian season pangngai khelh 34-ah an club chanchina point an ruh hnem ber hun tawngin Eastern Conference-a point 74 nen Supporters’ Shield an la a, MLS Cup play-offs lamah erawh beisei an pha ta lo a ni.
Pathianni zan Chase Stadium inkhelah Miami tan Matias Rojas chuan minute 17-na lekah goal hmahruai a thun a; he goal hi Argentina forward Messi thawhrah tiin a sawi theih a, ball thawnluh chu Aston Villa keeper hlui Brad Guzan chuan lo dansak mah se ball perlet chu Rojas hian goal-ah a chantir zui ta tho a ni.
Minute hnih a kal leh tihah minute hnih chhung lekin Jamal Thiare chuan 2-1-a Atlanta hmahruailetna goal khung zawn thawtin, minute 65-ah Messi chuan mualneitu team siphurh sutna goal tauhlut bawk mah se Bartosz Slisz chuan Atlanta United chakna goal ni zui ta a khung ve leh a; Miami lam hian minute 20 dawn an siphurh sut leh turin hun la nei mah se tlawm an pumpelh zo ta chuang lo a ni.
Thla hmasa mai khan David Beckham-a club Miami hi nakkuma Fifa Club World Cup an pawhfan tak vak khel tur team 32 zingah rinluh niin, Fifa president Gianni Infantino ngeiin a puang a, club naupang te la ni chungin khawvel huapah hming an chher nghal der dawn niin a sawi.
Nikum December thla khan Miami hian Uruguay striker Luiz Suarez senglutin, a Barcelona team-mate hlui pathum Messi, Sergio Busquets leh Jordi Alba-te nen an khelho leh.
Eastern Conference lamah Atlanta hian pakuana luah chungin play-offs an lut a, wildcard game-ah penalty peta Montreal hnehin Miami an hmachhawn zui ta a ni.
Semi-final lamah Atlanta hian Orlando City hmachhawnin, play-offs semi-final dangah New York City leh New York Red Bulls an intum ang a, last four lamah hi chuan game thum intum loin vawikhat khelhah final lut tur an chingfel mai dawn a ni.
A chak pahnih hian Eastern Conference final an khel dawn a, chu ta chak zawk chuan December ni 7 khian MLS Cup final-ah Western Conference play-off champion an hmachhawn zui leh dawn a ni.