Messi hoa India tlawh tur Argentina

Messi hoa India tlawh tur Argentina
A hun tak tihfel la ni lo mah se an captain ropui Lionel Messi telna Argentina football team chuan kumin October emaw November thla emaw hian Kerala state-ah football match an rawn khel dawn tih nemngheh a ni tawh.
He thu hi Kerala sports minister V. Abdurahiman chuan sawiin, Messi lo tel tur thu hi a sawi chiang a, chu chuan social media lama inhnialna a rawn titawp ta a ni.
Minister chuan Argentina football star leh a team inkhelh hun atan an state chuan October or November an tinzawn tih a sawi a, Messi tel leh tel loh chungchangah inhnialna leh rinhlelh tur a awm loh thu a sawi chiang nghal.
Kottayam khuaa thu a sawiah Abdurahiman chuan Messi a tel dawn, tel dawn lo tia social media lama inhnialna chu thil tul lo leh midang rilru tihbuaina mai a nih thu sawiin, mipuite chu thil chiang lo engmah a awm loh thu a hrilhfiah a, Messi-te ang legend-in an state an tlawh leh thei tur chu an tan inchhuan larhna tham a nih thu a tarlang tel.
South India lama Argentina national football team lo zin tur hi Kerala state sponsor tur niin, Reporter Broadcasting Company lamin sponsorship hi an buaipui a, Argentina Football Association (AFA)-in sponsorship chungchanga contract kalphung an neih zulzuia inremna siam a ni.
Reporter Broadcasting Company managing director Anto Augustine pawhin contract chungchanga AFA duhdan chu tihpuitlin vek tawh a nih thu leh Kerala state-a an inkhelh hun tur pawh nihchian theih a ni tep tawh tur thu a sawi ve bawk.