Messi inlan loh pheng vanga thinrim Hong Kong mipui

Messi inlan loh pheng vanga thinrim Hong Kong mipui
Pathianni khan Hong Kong khaw-puiah Lionel Messi club vawn mek Inter Miami leh tualchhung league-a an player tha thlankhawm League XI an tih chuan pre-season friendly match an khel a; Argentine inkhel en chakin khelmuala thutna awm zawng zawng luah khat tham ticket 40,000 vel zet hralhchhuah ni mah se an chan ber Miami captain hian khel-mual a lut lo tluanchhuak parh a, American team laka 4-1-a tlawm aiin an hmuh duh ber khelmual chhunga tlankual lai an hmu ta lo khan Hong Kong fans thin a tiur a, ticket thleng-letleh dilin mipui sang tamtak chu ‘refund’ tiin an aurual thup thup!
Ticket man tlanglawn ber hi pakhat Hong Kong dollar 1,000 (£101) a tling a, a tlawm chhe lo.
Hong Konger-te chu Messi inkhel enna tur ticket man phawrh kawngah an kut a zum lo a, nikum December thla daih tawha an zawrhchhuah tantirh lai khan ticket pakhat manah Hong Kong dollar 880 atanga 4,880 inkar an seng hreh lo a, mahse, khelmualah an idol a inlan leh ta si lo a, an tuar thiam lo hle a ni.
Kum 36 mi Messi baka hmuhnawm dang Luis Suarez pawh bench lamah hian hnutchhiah niin, Inter Miami club-in nithum chama Hong Kong an thutchilh boruak chu duhawm lo zetin a tawp fel ta a ni!
Second half-ah mipui lungawi lo chu ‘Messi kan duh’ tiin an aurual thup thup a; inkhelh bana club neitu pakhat David Beckham-a lawmthu sawi lai pawh mipuiin an ‘boo’ khum hial a ni!
Argentina captain Lionel Messi avanga mipui khati zat kokhawm thei an nih laia an hmuh duh ber khelhtir a ni lo kha Hong Kong sawrkar ngaihdan pawh a ni bik lo a, match organisers Tatler Asia chuan ticket man an la tihhniam leh a ngaih mai theih thu thuchhuah siamin an tarlang ve nghal a, chuti a nih chuan ticket man refund an kalpui em lo a nih pawhin an tihtlawmna tal chu fans hnena an pekkir leh a tul dawn niin a lang.
Sawrkar thuchhuahin a tarlan danin Major Sports Events Committee (MSEC) chuan friendly match huaihawtna sum chevel zat atan Hong Kong dollar maktaduai 15 (USD 1.92 million) a phalsak bakah Hong Kong dollar maktaduai khat dang chu khelmual bik atan khawihchet a phalsak tih tarlang chungin, “Vawiina Messi khelh loh chungchangah football fans ang thoin sawrkar pawh organiser-te thil ruahman danah a lawm lo takzet a, organiser lam hian fans hnena insawifiah an ba a ni.
“MSEC chuan terms and conditions awmsa en mil chungin organiser-te chet lak dan a vil reng dawn a, Messi inkhelh loh vanga ticket an hralhchhuah tawh man an tihhniam leh tihhniam loh hi endik tur zingah a tel,” tiin fans tilunghnurtu organiser lamah khauh taka an tuan mek thu an tarlang.
Organiser lam pawh hian thuchhuah siam ve tawhin, Messi leh a Barcelona team-mate hlui Suarez chu anni lam pawhin khelmual lut ngei tura an beisei thu leh an inlan tak loh avanga pawi an tih takzet thu sawiin, “News report thenkhatin engkim hresa vek angin min chhuah bawk mah se Tatler chuan inkhel tan hma lawk thleng khan Messi emaw Suarez emaw luh loh tur thu kha kan hre lawk bik lo a, bench lamah an thu tluan dawn tih hrilh kan ni lo.
“An team medical department lamin kha match khel tur khan Messi leh Uruguay striker Suarez an fit lo tih an puang hnuhnawh a, midangte ang bawkin keini lam pawh kan lunghnur takzet a ni,” tiin thuchhuah an siam.
Miami head coach Gerardo Martino chuan Messi leh Suarez a luhtir loh chhan sawifiahin, an hliam tenau neih mek a punlun an hlauh vang a nih thu a sawi a, “Leo hian a kaihza tihrawl a complaint a, medical team nena kan sawiho hnuah vawiina khelmual luh hi footballer tan a risky lutuk kan ti a ni.
“Luis chungchangah pawh a khup lamah harsatna a nei a, Saudi Arabia lama kan match hnihna kan khelh zawh khan a vung hial a, ani pawh vawiin match atan a fit lo a ni.
“Vawiina he stadium-a lo pung-khawm Leo leh Luis inlan loh vanga lunghnur zawng zawngte dinhmun kan hrethiam a ni,” a ti.
Friendly match chu sawi loh Inrinni training session-a Inter Miami captain chevel thlir tur ringawt pawhin mipui thahnem tak Hong Kong Stadium-ah khan an pungkhawm tawh a, number 10 jersey lekchhuak fur chungin “Messi! Messi! Messi!” tiin an aurual dual dual a; Beckham pawhin khelmualah tualchhung naupangte a han chhawnchhaih vel a, Messi avanga American club naran ni ve mai thin friendly match khel lai en chaka mipui tam mangkheng an punkhawm laia an kal chhan ber lut leh ta si lo kha han lawm viauna chi a ni lo ve bawk a ni!
Zirtawpnia Saudi Arabia atanga Hong Kong an thlawhluh lai pawh khan World Cup winner Messi hmuak turin amah ngaisangtu fans thahnem tak chuan thlawhna tumhmun lamah Argentina blue and white jersey bakah Miami shirt rawng pink vai chungin Major League Soccer club hi an lo hmuak tawh a; an thlenna team hotel kawtah pawh fans za chuang an pungkhawm bawk.
Media lamin an biakpawh rawlthar kum 16 mi Aasir Mubarak chuan a idol Messi vanga football ngaihven leh en thin a nih thu sawi chungin tun kha a hring-a-hrana Argentine a hmuh vawikhatna leh a tan chuan ni chhinchhiahtlak, a hriat reng tawh tur a nih thu a sawi.
Kum 19 mi zirlai Gary Sheng pawhin football khel a en tan kum 2014 atang tawha Messi fan ruhkawl a nih nghal thu sawi chungin tunhma lamin Argentina captain hnai taka hmuhna chance a la neih ngai loh thu a sawi a, football king nen metre tlemte chauha an inhlat ta mai chu tawngkaa sawichhuah zawh loh phurna thlentu tiin a sawi ve bawk.
Inter Miami hian pre-season tour an kalpui mek a, Tokyo lamah naktuk, Nilaini hian J-League champion Vissel Kobe chu friendly match an khelhpui leh dawn a, Hong Kong mipui ang bawkin Japanese fans-in Messi an chang thlawn ve leh dawn em kan thlir ang!
February ni 21 khian Major League Soccer campaign bul an tanna inkhelah Inter hian Real Salt Lake an hmachhawn ang.