Messi kawr man a to

Messi kawr man a to
Tarlan tawh thin angin, kumin Fifa mipa World Cup-a Messi-a’n Argentina a champion-puina jersey parukte kha New York khuaah an lilam a, US dollar ma-ktaduai 7.8 tehreng an hmuchhuak tling!
New York City, US-a auction house Sotheby’s an tihah 2022 FIFA World Cup match ruka Argentina captain Lionel Messi kawr hak kha Ningani khan an lilam a, sumfai heti zat hi tlingkhawmin, Sotheby’s chuan tuna Messi kawr paruk hralhna man hian tunhma lama football player bik kaihhnawih lilamnaa an sum hmuh record a khum niin an sawi a, kumin chhunga infiam-na lam kaihhnawih hrim hrim lilamnaa an sum ruh hnember a nih nghal thu an tarlang.
Football game nena inzawm kawr hralhna man to ber record dinglai Messi kawr hmanga khum tak chu nikuma pound mak-taduai 7.1-a Diego Mara-dona ‘Hand of God’ jersey an hralhna kha a ni.
New York City-a Messi kawr paruk an hralh zingah hian nikum Qatar ram Fifa tournament lian final first half chhunga a hak kha a tel nghe nghe. A dangte chu semi-final, quarter-final, last-16 leh group game pahniha a hak-chhuahte kha an ni.
Messi captain-na hnuaiah Argentina chuan final-a an khingpui France kha penalty petah an hneh hram a, a career-a Messi la lakloh trophy awmchhun a hmin zui ta a ni.
Ballon d’Or award vawiriat dawng thei awm-chhun Messi hi Argentina champion-na kawngah khan a thawhhlawk chung-chuang hle kha a ni a, World Cup history-ah tour-nament pakhat chhunga group stage, last 16, quarter-final, semi-final leh final match thlenga goal khung kim vek thei awmchhun a ni.
2022 World Cup-ah khan Argentina match sarih khel kim barh mah se group stage-a Messi kawr hak pathum zinga pahnih chiah kha Ninga-nia lilam zingah hian a tel a, a chhan pawh Australia nen an insut tum khan Cammy Devlin nen kawr an inthleng vang a ni.
Sotheby’s Head of Modern Collectables Brahm Wachter chuan football chanchina player hlawhtling leh trophy hawn hnem ber thuam hlu bik an lilam tak chu sports history-a hun chhin-chhiahtlakberte zinga pakhat a nih thu a sawi.
Sotheby’s thuchhuah chuan lilamna atanga an sum hmuhchhuah then-khat chu Leo Messi Foundation thlawpnain Sant Joan de Deu Bar-celona Children’s Hos-pital enkawl Unicas Project-ah an chhunglut dawn a; he damdawi inah hian Messi naupan laia a vei ang deuh natna vang tak thenkhat vei mek naupang engngemawzat enkawl mek an ni.
Argentina naupang Messi pawh kha a naupan laiin a te hle a, Barcelona khawpuiah Catalan team-in an lak chhoh hnu khan a bik taka enkawlna a dawng nghe nghe a ni.
1998 NBA Final ope-ning game-a Michael Jordan-a jersey nikuma an hralhna man US dollar maktaduai 10.1 kha game nena inzawmna nei hriatrengna thil (game-worn sports memorabilia item) lilamnaa an sum hmuh hnem ber record dinglai a la ni.