Messi laka dawhtheihna tlachham PSG fans

Messi laka dawhtheihna tlachham PSG fans
Ligue 1 table-ah hma la hruai chhunzawm zel bawk mah se Pathianni zanah Paris Saint Germain chuan sikhat faiin an mikhual Lyon an hneh lo leh ta a, ti hian, kumin bika an khel-muala an vawisarih chaklohna ni tawh-in, Parc des Princes-a an tlawm leh zan hian PSG fans lawmlo chuan an team khelmual chhuahsan tur an ‘boo’ khum hum hum a, Champions League trophy chawipui thei lo Lionel Messi pawh an dim chuang lo a, a laka an thinrimna thawm an chhuahkhum.
Kumin nipui thawt ruala a contract hmang zo tawh tur Argentine hi a club hlui Barcelona nena sawirik a nih mek laiin PSG beisei lian ber Champions League trophy lakpui kawngah a la hlawhchham tluang zel a, tun season leh a hma chiahah khan Champions League last-16 a paltlangpui zo lo ve ve a, Pathiannia Lyon hneh loa Paris an tlawm leh hnuah PSG fans thinrim hian an superstar langsar ber tana ngaihthlak nuam lo turin home supporter lamin thawm an chhuah.
He inkhela goal awmchhun leh mualneitu team tlawmna ni nghal hi second half tir lam minute 56-a Lyon forward Bradley Barcola tihluh niin, Paris match hi tan hun tura bituk aiin minute 10 zetin an tan tlai a, a chhan pawh Lyon bus chian loh vang a ni a, a kual zawngin khawpui an lut a, inkhel an tan tlai phah.
First half minute 39-ah Ligue 1 table-a pakuana luahtu mikhual team hian penalty kick hlawhchhuakin, Alexandre Lacazette chuan goal ban a chhuihper a, second half tir lamah Kumbedi siamsak atangin Barcola chuan Lyon chakna goal a tilut zui ta tho a ni.
Hun tawp hnaih lamah PSG player awm tawh zawng zawnga goal khung hnem ber ni mek Kylian Mbappe chuan an siphurh sutna hun remchang hmu bawk mah se a shot chhe lo tak chu dansak a ni.
French champion ni kumtin deuh thaw PSG hian table-ah hma la hruai chhunzawm bawk mah se khelh kua la awmah point ruk chiahin anmahni hnaihbertu Lens nen an inthlau tawh a; pathumna Marseille nen pawh point ruk bawkin an inthlau.
Nikum World Cup zawh hnu khan PSG hian Argentina champion leh France pahnihna ni kha an hlawkpui hran lo a, Messi leh Mbappe kawltu team hi Qatar tournament zawh hnu inelna hrang hranga match 18 an khelh tawhah vawisarih lai tlawm tling tawhin, World Cup chawlh hmaa game 22 chhung tlawm an pumpelh zawn boruak kha an pha lo hle a ni!
A club vawn lai tan game 67-a goal 29 thun tling tawh Messi leh PSG lamin contract pawhsei chungchang an sawiho tan mek laiin Barcelona pawhin an fapa rangkachak ni thin hi Nou Camp-a hruaikirleh tumin thawm an chhuah tan ve mek bawk.