Messi leh Ronaldo hnungah Lewandoski

Thawhleh zana UEFA champions league khelhah FC Barcelona chuan an mikhual Brest chu 2-0 in an sawp. An mualah an chak tum hian Robert Lewandoski chuan goal hnih thunin, champions league-ah goal 100 a thun tling chiah. Barca an chak rual hian La Liga club lian Atletico Madrid pawhin awlsam takin hnehna an chang ve bawk.
Barcelona hian Estadi Olímpic Lluís Companys-a an mikhual Brest lakah bul an tan tha viau a, goal pawh an thun hma hle. Catalan club lian hian inkhel tan atanga minute 10-na lekah Robert Lewandoski chuan a hlawhchhuah penalty a pet goal a, hmahruaina goal thun. Hma takah goal an thun vangin Barca hi phur viau mah se goal dang an thun belh har hle thung. Hun rei tak minute 50 chuang zet goal lut a awm belh theih loh hnuin Dani Olmo chuan minute 66-naah an goal hnihna a thun ta hram a, Catlan club lian hmahruaina a tizau.
Olmo goal thun hnuin goal lut a awm belh thei lo leh reng a, hun tawp dawn tepah Lewandoski a inlar leh ta thung. Goal hmahruai thuntu Lewandoski hian minute 90+2-ah Barca goal thumna thunin a tawp a khar a, an mualah 3-0 a hnehna changin point thum an hmu. Brest hnehtu Barcelona hian khelh 5 atangin point 12 an hmu a, he thu buatsaih lai hian pahnihnaah awm mekin, an chung chiaha awm Inter Milan chu point khat chauhin an phak lo.
Brest lakah goal hnih a thun vangin Robert Lewandoski chuan Champions League-ah goal 101 a thun tling chiah a. UCL-ah goal 100 thun tling thei pathumna a niin a chungah hian goal 129 thun tawh Lionel Messi leh goal 140 thun tawh Cristiano Ronaldo te an awm. UCL a goal 100 thun tlin nan Lewandoski hian game 125 a mamawh a, goal 100 thun tling turin Ronaldo aiin game a mamawh tlem zawk. Champions League-a goal thun hnem ber Ronaldo hian goal 100 thun tling turin game 137 a mamawh a. Lionel Messi erawh chuan goal 100 thun tling turin game 123 a mamawh ve thung.
Champions League-a goal 101 thun tling thei Lewandoski hian Europe khawmuala club inelnaah goal 368 a thun tling tawh a, Europe a league lian zual panga; La Liga, Bundesliga, Premier League, Serie A leh Ligue 1 a goal thun tam patumna a ni. Lewandoski chunga awmte hi Ronaldo (385) leh Lionel Messi (408) te bawk an ni. Lewandoski hnuai chiahah hian goal 263 thun tawh Harry Kane a awm a, Kane nen an inthlauhna hi goal 100 zet a ni. Lewandoski hian Champions League-ah bik Borussia Dortmund tan goal 17 a thun a, Bayern Munich tan goal 69 a thun bakah a khelh mekna FC Barcelona tan goal 15 a thun tling tawh bawk.
Atletico pawh an chak
An muala Barcelona na zat let chiahin Atletico Madrid chuan hnehna an chang a, mikhual an nihna hmunah 6-0 ngawtin mualneitu Sparta Prague an sawp.
La Liga club lian Atletico Madrid tan hian Julián Álvarez leh Ángel Correa ten goal hnih an thun a. Marcos Llorente leh Antoine Griezmann ten goal khat ve ve an thun bawk.