Messi leh Ronaldo tel lohna Ballon D’Or!

Messi leh Ronaldo tel lohna Ballon D’Or!
Season liamtaa Manchester City champion-puitu Spain midfielder Rodri chu keini Thawhlehni zan khan khawvela footballer tha ber lawmman Ballon d’Or award hlan a ni a, a elpui lian pahnih Brazilian Vinicius Jr leh England star Jude Bellingham-te a hmakhalh.
Tun hi kum 2008 hnu lama Lionel Messi emaw Cristiano Ronaldo emaw ni loin he chawimawina hlu bik an dawn vawithumna chiah niin, kum 2003 hnu lama nominee final list 30 zinga Messi emaw Ronaldo an lan loh vawikhatna a ni bawk.
He award vawinga dawng tawh Portugal superstar Ronaldo kuta kum 2008 award a luh tum kha Premier League player-in Ballon d’Or award a dawn tawpna ni tawhin, Saudi Arabia lama a kal tak hnuah nikum pawh khan nomination-ah a lang pha tawh lo.
Record siama vawiriat dawng tling awmchhun Messi pawhin nikumah Argentina chu Copa America trophy lakpui bawk mah se kumin hian nominee list-ah a lang pha bik lo a, kum 2023 kha a dawn tawp a ni ve ta rih.
A vawikhatna atana he award dawngtu Rodri khan tunhnai thla 18 liamta chhungin khelmualah a luhah vawikhat chiah tlawm a nei a, chu chu season liamta FA Cup final-a City-in rin loh taka Manchester United an hneh loh ringawt kha a ni.
Etihad club chu a zawna a vawilina atan Premier League trophy a lakpui a; kumin European Championship-a Spain-in record siama an title palina an lakna kawngah thawhhlawk lehin, best player atan thlan a ni nghe nghe.
Rodri hian City chu Premier League bakah Uefa Super Cup leh Club World Cup trophy a lakpui bawk.
Kum 2023 khan Manchester City chu Treble champion nipui bawk mah se nikum Ballon d’Or thlannaah Rodri hi pangana a ni pha chauh a, kumin erawh a dan a dang ta a ni.
Kum 28-a upa Madrid khaw tuiliak hi kum 1990-a dawngtu Lothar Matthaus hnu lama defensive midfielder zinga Ballon d’Or dawng leh thei hmasaber niin, Alfredo Di Stefano (1957 & 1959) leh Luis Suarez (1960) dawta Spaniard zinga he chawimawina dawng thei pathumna a ni nghal bawk.
He award hi Spanish league player-te’n awpbet hle thin mah se kum 60 chuang liamtaa Barcelona great Luis Suarez hnu lamah khan Spaniard kutah a lut thei ta reng reng lo a, kum 2010 World Cup bakah kum 2008 leh 2012 Euro title hawntute kha Spain ‘golden generation’ tih hial ni mah se mak takin khatih laia an player-te pawh khan Ballon d’Or hi an dawng thei chuang reng reng lo!
City coach Pep Guardiola ngeiin khawvela midfielder tha ber tia a sawi Rodri chuan a rawn dawng ta nawlh a, lawmman semna dawhsana a la din laiin Barca player chuan, “Vawiin hi ka tana hnehna a ni lo a, Spanish football hnehna zawk a ni.
“He award dawn phu ngawih ngawih dawng si lo player tam tak an liam tawh a, (Andres) Iniesta, Xavi (Hernandez), Iker (Casillas), Sergio Busquets leh mi tam tak an awm,” tiin a hmaa mihuai kalhmasate hming a lamchhuak.
Rodri hi England-based player zingah Manchester United legend George Best (1968) leh Liverpool mihrang Michael Owen (2001) tih loha he chawiawina dawng thei pathumna a ni.
Manchester City player zinga he chawimawina dawng thei hmasaber Rodri dawt chiaha vote hmu sang ber chu Real Madrid leh Brazil winger Vinicius Jr. niin, pathumna Real Madrid midfielder Jude Bellingham chu kum 2005 daih tawha vote hmu tam pahnihna lo ni ve tawh Frank Lampard hnu lama English player zinga Ballon d’Or dawng teuh ber a ni!
Rodri national team-mate Lamine Yamal kutah best Under-21 player lawmman Kopa Trophy lutin, game sarih chhung chak fai veka Spain-in Euro 2024 title an lakna kawnga a thawhhlawk vang kha a ni.
Ballon d’Or hi Fifa men’s world ranking-a top 100 chin ram atanga journalist sawmbikte’n vote hmanga an thlanchhuah thin a ni.
Nikuma he award dawngtu Barcelona Spanish midfielder Aitana Bonmati kutah women’s Ballon d’Or award a lut nawn ve leh bawk.
Bonmati chipui Jennifer Hermoso chuan football-a hmeichhiate dikna a auchhuahpui avangin Socrates Award a dawng.
An player Vinicius Junior kuta award a luh loh avangin Real Madrid chuan kumin Ballon d’Or award sem inkhawm hi an boycott a, men’s club of the year award an dawng chung leh an manager Carlo Ancelotti chu men’s coach of the year-a thlan a ni chungin Bernabeu club atang hian lawmman semna hmuna inlan tumah an awm lo a, Italian coach pawh hian a hmunah Johan Cruyff Trophy a dawng lo!
Season liamtaa European leh Spanish league double-tu Barcelona kutah women’s best club award a lut thung.
Season liamta inelna hrang hranga an club vawn lai tana goal 52 thun tling ve ve Harry Kane leh Kylian Mbappe chuan best goalscorer award Gerd Muller Trophy an dawng.
Real Madrid-in award sem inkhawm hi an boycott avangin France forward Mbappe chu a hmunah a inlan lo a; Bayern Munich-a a season khatnaa chetha England captain Kane chuan lawmman a dawng.
Ballon d’Or men’s award standing-a 10-na Kane chuan an club legend Karl-Heinz Rummenigge kut atanga award a dawng kha hlu a tih thu a sawi.
Nikum ang bawkin Aston Villa leh Argentina goalkeeper Emiliano Martinez chuan best goalkeeper lawmman Yashin Trophy a dawng leh.