Thawhlehni South American World Cup qualifiers inkhel pakhatah Argentina chuan 4-1-in an mikhual Brazil an sawp a, inkhel hmasa lamah Bolivia leh Uruguay an inhnehtawk avangin Argentina hi khelmual an luh hmain 2026 World Cup khel turin an tling hman a ni.
Brazil captain Marquinhos chuan Buenos Aires khawpuia Estadio Mas Monumental-a an tlawm chian hle hnuah fans ngaihdam a dil chul nghe nghe!
Brazil laka Argentina goal li hi Julian Alvarez, Enzo Fernandez, Alexis Mac Allister leh Giuliano Simeone-te thun niin, mikhual goal neihchhun hi darkar chanve khelh tlin hma deuha Matheus Cunha tihluh a ni thung.
Tun kha five-time world champion tan World Cup qualifying-a an chetchhiat ber tum niin, kumthar Fifa tournament khel turin an tling ngei dawn em tih a chiang lo tulh tulh!
Brazil captain Marquinhos chuan Brazilian TV station Globo kaltlangin an mite laka thupha chawina a sawi a, “He hmuna kan khelh dan ang hi thlen nawntir chi a ni tawh lo. A manganthlak takzet a, sawichhuah mai mai ngam chi pawh a ni lo. Bul kan tan chhia a, kan theih chin kan pha lo hle a,anni lam thung khan inrintawkna thuk tak nen an khel bik a, zei taka khelh dan an hria a, kan fans chungah ngaihdam ka dil e,” a ti.
Tarlan tak angin, Argentina hian an thenawmte lakah an superstar captain Messi an chhawr lo a, chuti chung chuan Alvarez leh Fernandez-te goal hmangin a tir lam minute 12 lek chhungin sihnih faiin hma an hruai hman tho!
Cristian Romero tihsual hlawkpuiin Cunha chuan mikhual Brazil siphurh pakhat zawk sut then ve bawk mah se Mac Allister chuan half-time hmain sihnih faia Argentina hmahruaina a dinthar leh.
Hun tawp hma minute 19 la awma Simeone-a goal an lawm hmain Argentina khan goal khung belh theihna hun remchang vawi duai lo an bawhpelh a, chuti ni lo se home fans khan an kawtkaiah kha aia tam goal lawm tur an nei ngei ang!
Inkhelh banah Atletico Madrid forward Alvarez chuan chhinchhiah leh hriatreng tlak result a nih thu sawi chungin Brazil laka an hnehna sualchhuah avangin an inchhuang tih a sawi a, fans hlimna an siamsak avangin a lawm hle tih a tarlang tel.
Lionel Scaloni team Argentina hian match 14-a point 31 hmuin South American table-ah hma an hruai mek a, point 16-in pasarihna luahtu Venezuela nen an inthlau tawh a, nakkum World Cup khel turin an dinhmun a him ta a ni.
Point 21 nei ve tawh Brazil hian palina luah mek mah se match li khelh tur la awmah an dinhmun a la chiang lo.
South America khawmualpui atang hian point hmu sang parukte chu automatic-in an tling ang a, pasarihna hian international playoff kaltlangin chance an la nei leh dawn a ni.
Thawhlehni South American World Cup qualifiers inkhel dangah goal hnih ve ve thunin Paraguay leh Colombia an inhnehtawk a; Paraguay hian table-ah pangana luah chhunzawmin, parukna Colombia nen point khat bawkin an inthlau chhunzawm leh rih.
Barranquilla khaw inkhelah Luis Diaz leh Jhon Duran-te goal hmangin Colombia hian tan atanga minute 13-na lekah sihnih faiin hma an hruai hman a; chawlhlawk hmain Junior Alonso chuan Paraguay siphurh pakhat sutin, Julio Enciso chuan second half-ah Paraguay tan a thun ve leh.
Messi tel loa Brazil hneh thei Argentina!
Get real time updates directly on you device, subscribe now.