Messi vs Ronaldo kan hmu leh dawn

An career-a tum 30 chuang zet khelmual chhunga lo inep tling tawh Cristiano Ronaldo leh Lionel Messi-te chuan Europe khaw-mualpui chhuahsan ve vein club inelna level hniam zawk an pan a, football match ngei maia an inhmachhawn lai khawvelin a thlir khat ta a, kum tharah erawh Riyadh Season Cup-ah an intawng leh dawn!
Messi-Ronaldo ringawt hian belh-khawmin footballer mimal chawimawina ngaihhlut hlawhberte zinga mi Ballon d’Or award 13 hui tlingin, a la tam zawk Argentine kutah award vawiriat a luh laiin Portuguese hian vawinga a dawng ve tawh thung.
Ti chuan, Lionel Messi khelhna Inter Miami leh Cristiano Ronaldo club Al-Nassr chuan kum thar tir lam hian Riyadh Season Cup khelin Saudi Arabia an pan dawn a; Thawh-tannia Major League Soccer team Miami thuchhuah chuan Arab rama team hnih an hmachhawn tur zinga Cristiano Ronaldo club vawn lai Al-Nassr a tel thu an puang.
Riyadh Season Cup hi team pathum inelna round-robin tournament niin, Inter Miami tana an international tour hma-saberte zinga mi niin, an tour kal chho turah hian El Salvador leh Hong Kong lama zin-chhuah a tel bawk.
Miami hian kum thar January ni 29 khian Riyadh khawpuia King-dom Arena-ah Europe-a hming chher tawh player langsar khawm tam club ve bawk Al-Hilal su phawtin, February ni 1-ah Al-Nassr nen he khelmualah bawk hian an intum leh dawn a, hei hi Messi vs Ronaldo match tur chu a ni.
Inter Miami chief business officer Xavier Asensi chuan press release a tihchhuahah he hun nghakhlel tak tak fans tan inhmelma kumhlun intawnlehna hun an buatsaihsak dawn tih a sawi a; Saudi Arabia khawpuia an club tantu tharte nena an intawkkhawm tur phurawm an tih thu sawi chungin an match hnih khelh tur chu khawvel pawhin a ngaihven ngei tur thu a tarlang tel.
Major League So-ccer lama a input liam hma khan Argentina captain Messi pawh hian sum tam uchuak tak hlawh turin Saudi league atanga sawmna a hmu ve tho a, mahse, Paris St Germain atanga a chhuah hnu khan Miami zawm a thlang ta zawk a ni.
A club thar chu Leagues Cup-ah trophy lakpui nghalin, Argentina captain an chhawr miau avang hian Inter Miami tan ticket man tihpun leh zawrhchhuah a nuam ta em em a ni!