Meta-in Trump lawsuit inrem nan $25M pek an remti

Meta-in Trump lawsuit inrem nan $25M pek an remti
US President Donald Trump-a term hmasa zawk a tawp dawn kan, January ni 6, 2021-a Trump tantu ten Capitol an luhchhuah hnua Fecabook chuan Donald Trump-a Facebook account an suspend sak a, Trump hian hetianga an account an suspend sak mai hi lungawi lovin court-ah zualko a, tunah chuan Facebook parent company Meta chuan he lawsuit tihtawp a inrem nan dollar maktaduai 25 thehchhuah an remti ta.
Donald Trump-a President tum hnihnaah chuan sumdawng lian ten Trump hi thawhpui an chak ve leh tawh thung a, chung zingah chuan Meta leh an CEO Mark Zuckerberg pawh telin, technology company tam takin Trump-a sorkar thar hi thawhpui dan an zawng ta hut hut mai a ni.
He thu buatsaih lai hi chuan Meta leh Trump inremna sum hi engtianga inpek tur nge tih puanzar a la ni lo va, mahse, media thenkhat chuan dollar maktaduai 25 atanga maktaduai 22 chu hlawkna um lo pawl, Trump-a presidential library tur kutah a lut dawn niin an tarlang a, a la bang dollar maktaduai 3 dang chu legal fee leh thil dang neuh neuhah a kal ral dawn thung a ni.
Mark Zuckerberg hian nikum November khan Florida-a Trump-a private club Mar-a-lago-ah Trump hi hmuin, zanriah te pawh an kilho a, heta tang hian Trump nen an intitha ta riau a, US President 47-na ni tura Trump lak luhnaah pawh Meta hian dollar maktaduai khat thawhin, a langsar laiah Mark Zuckerberg hi a thu pha ta a ni. Trump lak luhnaah hian khawvel huapa technology lama mi langsar dang Google CEO Sundar Pichai, Amazon neitupa Jeff Bezos leh X, SpaceX leh Tesla neitupa Elon Musk te pawh an tel.
Hmanni lawk khan ABC News pawhin Trump-a’n an laka intihmingchhiat thubuai a siam chu inrem nan dollar maktaduai 15 thehchhuah remtiin an inrem a, heta sum pawh hi Trump-a presidential library a chhun luh tur a ni. ABC New anchor George Stephanopoulos chuan Trump hian hmeichhe pakhat E. Jean Carroll pawngsualin thiam loh a chang niawmin TV-ah a sawi chhuak a, hei hi Trump hian a khing ta a ni. ABC News hian Trump-a ukil rawihna dollar maktaduai 1 an tum sak bawk.