Metallica tattoo ngah ber record siam

Metallica a han atchilh ve tiah tiah khawp a, a taksaah Metallica kaihhnawih tattoo 43 ngawt mai a chhut kai tir a, Guinness World Record a siam phah ta a, GWR chuan band pakhat tattoo ngah berah an puang.
A hming chu Tom Engelbrecht a ni a, Norway a cheng a ni a, “Ka ke ler atanga khup thleng hi Metallica history a ni mai, album cover, DVD cover, letter, newspaper clip leh lyrics te a awm,” a ti.
A malpuiah pawh 1983 atanga Metallica band member te hmel a chhut kai tir vek a, a banah Metallica LP cover lu ruh lem leh official t-shirt te a chhut kai tir bawk. Heng bakah hian a nak-ah Metallica hla thu thenkhat a chhut tir a, chumi hnuaiah chuan luruh lem awmin, a darah ‘Fade to Black’ hla note a awm bawk.
Tom hian heng tatoo zawng zawng chhut kai nan hian Norway pawisa kroner 2,50,000 (dollar 24,100 vel) vel a seng tawh niin a sawi a, tunah chuan a man hi a chhut buai duh tawh lo ni a sawiin, a pawisa sen huin a tattoo chhutkai chu a hlua a hriat thu a sawi bawk.
Tom hian Metallica kaihhnawih ni kher lo pawh tattoo a nei nual a, a taksa hmun thuma thena hmun khat chu Metallica tattoo a chhut khah vek a tum niin a sawi a, heavy metal music fan a ni nain, Metallica chiah chu a taksa reh thei tawh lo tura chhut kai phu awm chhun ni a a hriat thu a sawi bawk.
Tom hian Metallica concert vawi 24 a en tawh a, 2015-a Bergen-a an concert chu nuam a la tih ber thu sawiin, 2009-a Metallica concert tuma stage-a microphone-a a zaipui theih tum pawh a hriat reng tur a nih thu a sawi bawk.