Mexico-ah a huhoa ball pet zirin record an siam

Mexico chuan 2026 FIFA World Cup urlawk nan leh boruak vuak hot nan khawvel tum khata football pet zir tam ber record an siam a, record siam tur hian mipui 9,500 an pungkhawm a, minute 40 chhung a huhoin ball pet training session an nei. A hmaa hetiang record chu Seattle-a an siam niin, mi 1,038 participant an awm a, he record hi Mexico hian a rawn khum chiang hle a ni.
Guinness World Records tana endiktu Alfredo Arista chuan, “Mi 9,500 kan chhinchhiah a, a ropui danglam hle a ni. Ka lawmpui che u,” tiin record an siam thu a puang.
Mexico City Mayor Clara Brugada chuan record an siam hriatpuina dawn pahin, “Vawiin hian he Guinness World Record ropui hi kan siam a, mi 9,000 chuang kan pungkhawm a, theih loh tura ngaih leh thil ropui danglam tak pawh kan ti thei tih kan lantir a ni,” a ti.