Mexico hnehna nena title race hmahruaitu thar Norris

Mexico hnehna nena title race hmahruaitu thar Norris
Pathianni khan Mexico City tlankawng Autodromo Hermanos Rodriguez-a Mexico City Grand Prix-ah hnehna changin McLaren driver Lando Norris chuan ni 189 hnuah Formula One world championship hma a hruai ve leh ta hram a; kumin April thla hnu lama title race hma a hruai leh vawi khatna chiah a ni.
Kumin August thla tir lam Hungary rama hnehna a chan hnua grand prix-a chak thei ta lo Norris tan Mexico ram hnehna kha season kal laia a vawi ruk chakna ni tawhin, driver standing-a hmahruaitu ni reng leh a team-mate ni bawk Oscar Piastri aiin vawi khatin a la chak tlem a, a career-a grand prix hnehna vawi 10 a channa chiah a ni nghal.
British driver Norris hian pole position atanga bul tanin, lap tinah hma a hruai tluanchhuak vek a; season kal laia intlansiak vawi li chiah awm tawhah point 357 nei chungin championship hma a hruaikir leh thei chiah chiah a; a lehpelh tak Piastri chuan point 356 neiin, McLaren driver pahnih inthlauhna hi point khat chauh a ni!
Title race-a pathumna Max Verstappen pawhin point 321 a khawl tling ve tawh bawk.
Pathianni Mexico City Grand Prix-ah a hmahruaina hum zo ta lo Australian Piastri chuan pasarihna ni chungin bul a tan a; an tlanchhuah lai khan driver standing lamah a team-mate Briton aiin point 14-in a sang a, mahse, Autodromo Hermanos Rodriguez tlankawngah lawman semna dawhsan luah pha lo tawk chiahin palina a ni pha ta chauh a; lap hnuhnung pahnih la awmah virtual safety car a inlar avangin a dinhmun a phet ta a ni.
Runner-up Ferrari driver Charles Leclerc chu Norris aiin second 30.3-in a thleng tlai a, pathumna Red Bull reigning champion Max Verstappen lakah Monegasque hi second 0.7 lekin a thleng hmasa thung.
Palinaah British driver Oliver Bearman of Haas F1 Team thlengin, parukna chu Mercedes driver Kimi Antonelli a ni a; a team-mate George Russell thlen khalh chiahin, Ferrari star Lewis Hamilton chu 10-second penalty avangin a hnufual lo thei lo a, pariatnaah a thleng pha chauh a, kumin January thlaa a zawm thar Italian team vuan chungin podium a la lawnkai zo lo tluang zel!
Pakuana Esteban Ocon chuan a team-mate Bearman hnungzuiin Haas tan point a rawn thawkchhuak ve leh a; Sauber khalhtu Gabriel Bortoleto chu final point hmutu a ni.