MFA in club, official leh player an hrem

Mizoram tualchhung fooball in hun thim a tawng a, chanchin lungchhiatthlak leh mualphothlak takin football ngainatute a deng dawt. Mizoram Premier League season 11 khelh zawh takah match fixing a inhnamhnawih an awm vangin MFA chuan Team, Team official leh player hremna an tichhuak.
Mizoram Football Association (MFA) in an hrem tak club te hi MPL 11-a club thar pathum; Sihphir Venghlun FC, Ramhlun Athletic FC leh FC Bethlehem te a ni a. An ni club pathumte hi kum thum chhung football kai hnawiah reng rengah inrawlh thei lo turin an hrem. FC Bethlehem hi table mawngphah an nih vangin MPL atangin an tlahniam a. Sihphir Venghlun FC leh Ramhlun Athletic FC te hi MPL 12 khel chhunzawm thei tur an ni a, hrem an nih vangin MPL 12-ah hmunruak pahniha a awm dawn tihna a ni.
MFA in team offcial an hremte hi Robert Laldinthara, Sihphir Venghlun FC, Danny Lalduhawma, Ramhlun Athletic FC leh Johny Ramthansanga, FC Bethlehem ta an ni a. Anni pathum pawh hi kum thum chhung football kaihhnawih inhnamhnawih khapsak an ni.
Team pathum leh team official pathum hrem an nih lai hian player 24 zet hrem an ni thung. Lalnunzama, Chanmari FC leh L. Lotha, FC Bethlem te chungah hremna na tak lek a ni a, anni pahnih hi MFA hnuaia football kaihnawih hrang hrangah dam chhung inhnamhnawih phalsak an ni lo. Sihphir Venghlun FC player palite kum nga chhung atan hrem an ni a. Kum thum chhung atan player 10 hrem an ni bakah player pariatte lakah kum khat chhung atan hremna leklawh an ni bawk. MFA in an hrem takah hian Sihphir Venghlun FC player an tam ber a, player 14 ngawt hrem an ni. Ramhlun Athletic FC player pali, FC Bethlehem player pathum, Chawnpui FC player pathum hrem an nih bakah Chanmari FC player pakhat hrem a ni bawk.
MFA chuan MPL 11 ah thil duhawm lo tak a thleng hi pawi an tih thu an sawi a, an hma lam hun atan inelna dik, rintlak leh thianghlim nei thei turin player, team neitu leh football ngainatute zawng zawng theih tawp chhuah turin a sawm.
Football chik leh tualchhung football ngaina tak tak tan chuan MPL 11-ah khan result mak deuh deuh a awm a. Team tana bul tantute pawh rin loh tak tak a awm nawk. Coach berin starting line-up a rem theih loh te pawh a awm hialin sawi a ni ta zel bawk. Hetiang thil a awm nawk vangin MPL 11-ah hian match fixing a awm thei mai ang a tih a ni tan. Chik zawk leh hre ril zawk ten an chhui a, ni ngein an hria a, mah se kut man fak tura finfiahna tha erawh a awm tak tak thei lo. Eiru chhui ang deuh a nihna lai a awm. Mah se, thil dik lo na fam chu lanchhuah hun a lo awm ta a, miin an rilhlelh ruk, a tak ni lo hram se an tih thin kha a tak a lo ni ngei si a nih tak hi.
MPL 11-ah a match fixing titute hi Mizo an ni lova, Mizoram tualchhunga mite pawh an ni lo nia hriat a ni. India ramah hian sum inthap (betting) a tam em em a, sum veivir pawh a tam hle. Sum inthap lama tawnhriat ngah tak takte chuan MPL ah kua an rawn hreuh ve ta a, tun hi kan thleng a ni ber mai. A bul tumte hian club, club official leh player te sum pe in, chhawr tangkai bik an ni thin a. Club thenkhatah chutianga hman tangkai theihte chuan sum inthapna lama result inrinsiakna thlen dik tir turin hma an la zui ve ta thin niin tar lan a ni.