Manipur Jiribam district-a Central Reserve Police Force kuta thi Zo hnahthlakte ruang, Silchar-a post mortem tura tih chu Nilaini tlai lam thleng khan zawh fel a la ni lo. Silchar damdawi ina ruang awmte dinhmun hriatchian tum Zo hnahthlak pungkhawm chu Manipur Police-in an lo dan daih avangin Assam ram chhunga state dang police inrawlh chu an hrethiam lo tih pungkhawmte hian an sawi.Thawhlehni zanah Silchar Medical College-ah ruang paruk an post mortem a, a tuka chhunzawm turin zanlaiah an chawlhsan. Mahse a tukah thu dang a awm ta a ni.
Silchar atanga thu dawn danin, Manipur sorkarin sorkar laipuia Ministry of Home Affairs (MHA) hnenah ruang hi Mizorama kalpui lova thlawhna hmanga Lamka phurh thlen an duh thu an thlen a. Nilaini tlai lam thleng khan post mortem hi chhunzawm a ni lo.
Ruangte hi Silchar atang hian motor-in Aizawl panpuiin, Aizawl atangin motor bawkin Lamka panpui tum a ni a, YMA-in Mizoramah hian lo dawnsawn an tum. Manipur sorkar hian hei hi a duh lo a, a hma zawnga ngawi khan, ruang lak dan turah rawtna an nei ve leh hnuhnawh a ni.
Silchar Medical College kawtah hian Silchar-a Zo hnahthlakten thut chilhin an ngaihven reng a. Medical College hungchhung lama Manipur Police-ten an ven daih chhan chu hrethiam loin thim hnu thlengin an la innnawr buai. Zohnahthlakte hian Assam state chhungah Manipur chief minister N Biren Singh hian thuneihna a nei tel nge, tiin, Manipur Police inrawlh chhan hi media mite kaltlangin an zawt a ni.
The Aizawl Post thudawn danin, Churachandpur district chu tunhnaia Jiribam district-a thil thleng hian a ti nguiin, boruak a rit a; thu dang a leng meuh lo tih sawi a ni.
Mi 10-te ruang post mortem zo rih lo Assam-ah Manipur Police inrawlh?
Get real time updates directly on you device, subscribe now.