Mi 68 hnenah president-in Padma Award hlan

Mi 68 hnenah president-in Padma Award hlan
Chief Justice of India hlui, Jagdish Singh Khehar, lâm thiam Shobana Chandrakumar, lemchang thiam Anant Nag leh King George’s Medical University Vice Chancellor Soniya Nityanand te chu Thawhlehnia President Droupadi Murmu-i’n chawimawina ngaihhlut hlawh, Padma Awards a hlan mi 68 zingah an tel.
January 25 khan Republic Day vawi 76-na pualin India-a civil mite chawimawina chi thum – Padma Vibhushan, Padma Bhushan leh Padma Shri dawng tur mi 139 puan an ni.
President hian Thawhlehni khan Rashtrapati Bhavan-ah hming puan tawhte hnenah a thawh hnih nan chawimawina hi a hlan a, mi 68 an ni a. Vice President Jagdeep Dhankhar, Prime Minister Narendra Modi, Union Home Minister Amit Shah leh mi pawimawh dangte pawhin an hmanpui.
April 28 thlaa thawh khatna semah khan President Murmu-i hian mi 71 hnenah Padma Award hi a lo hlan tawh.
Ganatantra Mandap, Rashtrapati Bhavan-a civil mite chawimawina sang ber dawttu, Padma Vibhushan dawng zingah hian Justice (Retd) Khehar pawh a tel a. Kathak dancer Kumudini Rajnikant Lakhia leh hnam hla sa thiam, Sharda Sinha te an tel.
President hian civil mite chawimawina sang pathumna, Padma Bhushan a hlan pakua zingah lâm thiam leh lemchan thiam, Shobana Chandrakumar, sumdawng Nalli Kuppuswami Chetti, archaeologist Kailash Nath Dikshit, lâm thiam Jatin Goswami, lemchang thiam Anant Nag leh Sadhvi Ritambhara te an tel.
Economist Bibek Debroy leh Maharashtra chief minister hlui leh Lok Sabha speaker hlui, Manohar Joshi te pawh hlan niin Debroy-a nupui leh Joshi-a fapaten an dawng.
Immunologist leh KGMU VC Nityanand, footballer Inivalappil Mani Vijayan, zai thiam Ashwini Bhide Deshpande, lemchang thiam Ashok Laxman Saraf, mask maker Reba Kanta Mahanta, rimawi tum thiam Ricky Gyan Kej ten Padma Shri an dawng.
Theatre artist leh acting coach Barry John, hnam zai tum thiam leh parai player lar Velu Aasan, sumdawng Sajjan Bhajanka, Dr Neerja Bhatla, scientist Ajay V Bhatt, thu ziak mi Sant Ram Deswal, sakhaw hruaitu Acharya Jonas Mejetti leh Farooq Ahmad Mir te pawhin Padma Shri hi an dawng bawk.
Chawimawinate hi art, vantlang tana hna thawhna, vantlang thatna tur ngaihtuahna, science & engineering, trade & industry, damdawi, thu leh hla leh zirna, sports leh civil service-a mi tha bikte hnenah hlan thin a ni.
Kum 1954 atanga sem chhuah tan chawimawina chi thumte hi kum tin Republic Day hma ni-ah a dawng turte puan thin an ni.
A dawng tur thlan hi an hnam, an ei zawnna, an dinhmun leh an nihna (sex) avanga thlan an ni ngai lo.