Mi 8370-in Bana Kaih dil tawh

Sawrkar flagship programme, Bana Kaih Scheme hnuaia pilot project-ah implementing department thlan bikah dilna thehlut mi 8370 an awm tawh a. Commerce & Industries department-ah dilna lut a tam ber.
Bana Kaih Scheme hnuai a dilna lutte implementing department-ten an thlitfim hnua sum mamawh zat tur chu Mizoram State Policy Coordination Committee chuan adviser to chief minister (Hand Holding) Dr KC Lalmalsawmzauva kaihruaiin Thawhtanni khan an zirchiang a. Planning & Programme Implementation secretary Lalmalsawma Pachuau chuan thutkhawm chhan a sawizau.
Labour, Employment, Skill Development & Entrepreneurship (LESDE) department leh Bana Kaih scheme kalkawp theih dan tur, pilot phase atana progress partner thlan chhuah hmaa scheme kalpui dan tur zirchian, sensitization program buatsaih dan tur leh pilot phase atana sum mamawh zat sawiho a ni.
Adviser to chief minister chuan hlawhtlin tuma thiamna leh theihna nei, mi tumruhte kaih chhuahna tur ‘Bana Kaih Scheme’ thawhkhatna atan November thla china dilna lutte endik hmasak a ni dawn tih a sawi a. Implementing department-a nodal officer-ten uluk taka dilna an zirchian hnu ah apex body chuan a endik leh dawn tih a sawi a ni.
Thutkhawma tarlan danin, implementing department atangin dilna 8370 a lut tawh a, dilna lut hi nodal officer leh Search Team ten an zirchiang tawh. Commerce & Industries-ah dilna lut a tam ber a, 3346 a ni. Animal Husbandry & Veterinary-ah 2758-a lut bawk.
Aizawl district atangin dilna 1741 a lut a, Lawngtlai atangin 1413, Champhai 1228, Mamit 715, Kolasib 702, Siaha 667, Saitual 567, Lunglei 578, Serchhip 349, Khawzawl 326 leh Hnathial district atangin 84 lut tawh anga chhinchhiah a ni.
Implementing department hnuaia nodal officer leh Search Team-te endik hnu ah tun thlengin pilot phase atana apex body ennawn leh turin dilna 190 thehluh a ni.