Mi hnuaihnungte PM Modi Ram Rajya-ah leng lo ti

Bharat Jodo Nyay Yatra chu February 26 atanga March 1 thleng chawlh lailawk a ni dawn a, a chhan pawh Rahul Gandhi chuan a luhna thin Cambridge University ah special lectures tum hnih a neih dawn vang a ni.
Congress general secretary in-charge communications Jairam Ramesh chuan February 22 leh 23 ah chuan yatra tan chawlh a ni ang a ti bawk a.
Bharat Jodo Nyay Yatra chu February 24 zingah Moradabad, Uttar Pradesh atanga tan lehin Sambhal, Aligarh, Hathras leh Agra district te paltlangin chumi hnuah Rajasthan a Dholpur a lut ang tiin Ramesh chuan a sawi.
“February 26 atanga March 1 thleng Rahul Gandhi an a luhna thin Cambridge University (UK) ah special lecture tum hnih a neih dawn atangin chawlh lailawk a ni ang a, hei bakah hian New Delhi ah meeting pawimawh tak a nei bawk ang” tiin Ramesh chuan a sawi.
Bharat Jodo Nyay Yatra chu March 2 ah Dholpur atangin chhunzawm leh a ni ang, tiin Ramesh chuan a sawi bawk a. Madhya Pradesh a Gwalior, Shivpuri, Guna, Shajapur leh Ujjain district te a paltlang dawn a ni tiin Congress leader chuan a sawi bawk.
Ramesh chuan March 5 ah Gandhi chuan Ujjain a Mahakaleshwar temple ah darshan a nei ang a ti bawk a. Rahul Gandhi an darshan a neih hnuhnun ber chu November 22, 2022 khan Bharat Jodo Yatra a neihlaiin a ni.
Khawchhak atanga khawthlang Manipur-Mumbai yatra hian karkalta Zirtawp khan Uttar Pradesh a lut a, yatra hian state 15 tuamin 6,700 km a thui a kal dawn a ni. A tum ber chu nyay(justice) niin kalpahin mipui tam thei ang ber nen inpawhna neih thin a ni bawk.
February 21 a Kanpur a Bharat Jodo Nyyay Yatra neihnaah Congress MP Rahul Gandhi chuan BJP kaihhruai Centre sorkar chu Dalits leh backward classes te tana hna siam tam tawk lovah a puh a. Population a 90% an hauh chungin PM Modi ‘Ram Rajya’ ah an leng lo a ti.
“Eng Ram Rajya nge ni…Backward classes, Dalits, tribals leh minorities te population atanga 90% hauh ten hna an hmu thei lo” tiin Gandhi chuan a sawi a.
“Population atanga 55% chu backward classes an nia a, 15% Dalits, 8% tribal leh 15% minorities te an ni a. Eng ang pawhin au mah ula he ramah hian hna in hmu thei lo. Backward, Dalits, tribal emaw mirethei general category a tel innih chuan hna inhmu thei lo. Narendra Modi an mipui ten hna an hmuh a duh lo” tiin Gandhi chuan a sawi a.
Congress president hlui chuan India ramah caste divide a nasat em avangin Dalits leh backward class ten media emaw industry lianah leh bureaucracy ah pawh an aiawh tur an nei ngai lo a ti bawk a.
“Pran Pratistha ceremony ah khan backward classes mi leh sa eng zah nge tel, Dalits leh tribal eng zah nge tel. Tribal President Droupadi Murmu pawh sawm a ni lo, chutiang bawkin Dalit tho president hlui Ramnath Kovind pawh a chuhnga a luh an remti lo” tiin a sawi a.
Gandhi chuan an party chuan caste census an ngiat tlat tia sawiin chutianga survey neih hmang chauhin ram chhunga backwards te dinhmun tak tak leh sum engzah nge an neih kan hre thei chauh ang a ti bawk a. “India rama revolutionary step lian ber tur chu caste-wise census a ni” a ti.
Gandhi chuan India hausakna chu mi pahnih thum vel kutah a awm vek a ti bawk a. “Adani, Ambani, Tata, Birla heng mi pahnih thum vel te hian ro an rel khum che u a ni. Anni hi new India a Maharajas te chu an ni” tiin a sawi bawk.