Mi nuai 3.8 tan leh biak in 320 hnenah tui hnianghnar pek tum

Mi nuai 3.8 tan leh biak in 320
hnenah tui hnianghnar pek tum
Hunpui laiin Aizawl khawpuia mi nuai 3.8 vel cheng leh biak in 320 chuang awmah tui hnianghnar pek tumin department a nibuatsaih tih PHE minister Prof Lalnilawma chuan a sawi.
Krismas leh kumthar vuekveta Aizawl khawpuiin tui a mamawhna san belh tur phuhruk dan ngaihtuahin minister ho hian department hotute chu Ningani khan an thukhawm a. Kumin May-a Cyclone Remal-in a nuai chhiat hnu ah Greater Aizawl Water Supply Scheme (GAWSS) Phase I leh II chu tunah hian a pangngaiin a kal chho leh tan dawn a, GAWSS-III erawh siam mek a la ni.
December atangin GAWSS I leh II hi tluang taka pump theih a ni a. Nikhatah litre maktaduai 28.0 tui pump chhuah char char a ni tawh. Tunah Aizawlah mi 380000 vel awm anga chhut niin, tui pump sa zaa 35 chu leak leh thildanga luangral anga ngaih a ni a, mi pakhatin ni khatah litre 70 theuh hmang anga chhutin, nitina Aizawl tui mamawh hi litre maktaduai 35.0 a ni.
GAWSS I leh II atang chuan tui mamawh an pek sen loh bakah Aizawlah biak in 320 chuang a awm a, Krismas leh kumthar vuakvetah chawhrualin tui litre 30000 mamawh ang an ni. Hemi atana tui mamawh belh hi litre 9600000 vel a ni.
Ni khata tui litre maktaduai 10 pump theihna GAWSS III siam hna thawh mek hi Krismas hma chuan zawh theih an inbeisei thu thawktute chuan an sawi a. Siamtha hman lo palh ta se, tiin, hunpui laia biak ina hman tur ang hi November atang khan biak in tuizemah tlem tlemin an lo dah khawl lawk tawh tih department hotute chuan an sawi.
November thla tawp khan GAWSS II pumping line Khatlaah siam a nih avangin tui pump ni hnih chhung a khaih lak a. Ni hnih khat tui pump a khaihlak hian tui sem hi kar khat vel a nghawng thin tih an sawi. Hei hi mipui lamin hrethiam loin, electric line a chhiat a, siamthat ve leh power supply pek lehnghal mai theih ang hian, sem chhunzawm theih mai an beisei thin a, tui semah chuan a theih ve loh tih an sawi bawk.
8 Tunah hian Aizawl khawpuiah tui connection 81632 a awm mek a.
8 GAWSS Phase- I leh Phase-II tluang taka tui pump a nih hian public connection hi thlakhatah a tlangpuiin tui vawi hnih pek theih a ni. * * GAWSS Phase-III tluang taka pump theih chuan Aizawl khawpui tui mamawh a ti ziaawm a. Tui vawi thum pawh sem hman a ni.
8 PHE department hian tui leak reporter application a siam a, Play store atanga download theih niin, he application kaltlang hian PHE tui pipe leak chu mipuiin a report theih a ni.